جمال بناصر – كود//
تحولت فرحة اللعابة ديال شباب خنيفرة بتحقيقهم الانتصار بميدان المحمدية بواحد لزيرو إلى صدمة و حزن، بعدما عرفت رحلة العودة تعرض المدافع يخلف سفيان لحادث اعتداء شنيع تسبب ليه ف قطع العصبة ديال يديه.
الاعتداء وقع بإحدى محطات الاستراحة بسيدي علال البحراوي اللي اختار مسؤولو السياكا يتوقفو فيها باش يتعشاو اللعابة.
هاذ العشا غادي يتقلب لمشكل كبير و خايب بزاف، و ذلك بعدما وقع صداع بين اللاعب سفيان يخلف و واحد السرباي ف الريسطو. وهو الصداع اللي غادي يتطور إلى ما لا تحمد عقباه بعدما السرباي ضرب اللاعب بآداة حادة ليديه تسببت ليه ف جرح خطير تبين بعد معاينته من طرف طبيب الفريق أن اللاعب تقطعات ليه العصبة ديال اليد.
هذا و قد تم نقل اللعاب لمستعجلات سبيطار لوقف النزيف على أن يخضع اللاعب لعملية جراحية اليوم او غدا باش يخيطو ليه العصبة اللي تقطعات و اللي غادي تخليه يغيب لمدة طويلة عن الميادين مما سيشكل خسارة كبيرة للفريق الي كايعول بزاف على هاذ اللعاب ف خط الدفاع، خصوصا ان السياكا كاتسناها ماتشات صعيبة ف الفترة المقبلة.
وموازاة مع ذلك، علمت “كود” من مصادر محلية بسيدي علال البحراوي ان الكار ديال الفريق كان واقف قدام مقر لابريگاد ديال الجدارمية ربما من اجل تقديم شكاية بالفاعل، في حين مازال ماتعرف واش الفريق غادي ينصب راسو طرف مدني ف القضية من اجل المطالبة بتعويض عن الضرر اللي يقدر يوقع ليه بسبب حرمانه من خدمات المدافع ديالو.
