ميريكان غادي تعطي مكافأة ديال 10 مليار لأي واحد غادي يعطيها معلومات على المشة الكحلة
هشام أعناجي ـ كود الرباط//
حصلت “كود” على كواليس حرب داخل فريق الاصالة والمعاصرة، بين جوج برلمانيين كتهدد بافشال المهمة الاستطلاعية للوقوف على شبكات توزيع وتسويق المنتجات الفلاحية.
وحسب مصدر “كود” فإن رئيس اللجنة الاستطلاعية البرلماني البامي عادل دفوف، هدد بالانسحاب من المهمة، ولكن حيث “البام” خاص ضروري يترأس اللجنة حيث جات فيه النوبة، قنعو رئيس الفريق النيابي لحزب الاصالة والمعاصرة باش يبقا.
وفاش بدا عادل الدفوف اجتماعات اللجنة الاستطلاعية منذ 13 يونيو 2022، بدا صداع على طريقة العمل، خصوصا بعدما تدخل برلماني من نفس الحزب ادريس الشبشالي لي بدا كيهضر على امور غريبة وفيها توجيه لعمل اللجنة باش ميقيسوش بعض سلاسل الانتاج، واللي كتشم منها تضارب المصالح. وزيد عليها ملاحظات برلمانيين اخرين حول منهجية العمل. الدفوف هنا هدد بالاستقالة.
وبعد تدخل رئيس الفريق البامي احمد التويزي لي باقي عندو ملف فالمحكمة بتهم تتعلق بجرائم الاموال، تراجع دفوف عن الاستقالة ولكن بشرط ان داك البرلماني البامي لي هو نائبو مبقاش يحضر فعمل اللجنة، وهادشي لي وقع.
الغريب هو ان الدفوف مقادش على المهمة وباقي مخلينو البام، رغم أن باقي اعضاء المهمة الاستطلاعية دارو لحدود الساعة خدمة نقية خصوصا فاش مشاو زارو سوق الجملة بكازا بحيث وقفو على اختلالات كثيرة وثقوها اضافة إلى انهم ضمو فالتقرير كذلك المنع لي تعرضو ليه اثناء زيارة مجاز البيضاء لي كتسيرها خت قيادي بارز فالبام.
الدفوف تخلع من لول خصوصا وأن هاد المهمة غاتوقف على مسار ديال سلاسل الانتاج كلها من الانتاج للتزويد والتوزيع وغاتكشف على التلاعبات فهاد المسار كامل، هنا غاتولي قضية رأي عام وخلافات بين حيثان سلاسل الانتاج فالقطاع الفلاحي.
هاد الصراع وزيد عليها ضغوطات المتلاعبين والسماسرة ديال سلاسل الانتاج وتضارب المصالح كيهدد ببلوكاج هاد المهمة.
هاد الحرب بين الباميين كيتشم فيها محاولات باش يفشلو المهمة الاستطلاعية كيف وقع مع المهمة الاستطلاعية حول الدقيق المدعم فالولاية السابقة، بحيث التواطؤات لي وقعات فشلات هاد المهمة وسالات وخلاوها فالكراج ديال المهام الاستطلاعية لي مزال مداروش.
المهمة الاستطلاعية لي تبلوكات فالعهد السابق كان رئيسها هشام المهاجري، لي دغيا طلع لقيادة البام وتعين فالمكتب السياسي واخا كان قاطع المؤتمر فاش طلع وهبي، ساهم فهاد البلوكاج مع العلم أن المهمة الاستطلاعية كتبحث ف“الحيثان” و”اللوبيات” التي تتلاعب بالدقيق الموجه للفقراء بمختلف مناطق المملكة.
هاد التواطؤات كتهدد المهمة الاستطلاعية الجديد اللي كتهدف إلى الإجابة على مجموعة من الأسئلة، والإشكاليات المحورية التي تفرض نفسها، وفي مقدمتها طبيعة الصعوبات والاكراهات التي تواجهها محطتي توزيع وتسويق المنتجات الفلاحية خاصة فيما يتصل بتجميع هذه الأخيرة في يد واحدة بغية التحكم في أثمنتها.
وتبحث المهمة البرلمانية، وفق ورقتها التقنية، في مدى نجاعة النصوص التشريعية والتنظيمية، وكذا الإجراءات والتدابير والبرامج التي اتخذتها الحكومة ضمان توزيع وتسويق المنتجات الفلاحية بطريقة عادية خصوصا مع تعدد المتدخلين، والوسطاء والمضاربين سواء على المستوى الوطني أو الترابي.