سهام البارودي – كود//
هل تعلمين من هم ولاد القحاب يا صفية ؟
انا غانقوليك شكون ولاد القحاب يا صفية ! تبعي معايا!
-مرا خدامة فوزين البيض عند واحد السيد ناضت واحد النهار و شفرات ليه البيض و فاش سيفطها تتعاقب كأي شفارة ناضو “ولاد القحاب” كايغوتو ” واك واك علاش تعاقبوها مسكينة ” ” راه ماعندهاش مسكينة ” ” مافحالهاش و جاها الجوع مسكينة” ! بنادم كايبرر فعل الشفرة بشي مبررات واهية و بغاو يردو مول الوزين هوا لي غالط صحة حيت قرر يتابع وحدة شفارة ! و رضوها ماتت بالجوع داكشي علاش شفرات البيض فحالا حنا عايشين فدارفور !
– واحد كايتشكا فگروب فالفايسبوك من مالين الكرارس د الخضرة و الحوت لي مانعين عليه يسطاسيوني حدا دارو و مستاغلين الملك العام و كايخليو الزبل و يمشيو ! ينوضو ليه عاوتاني الجحافل ديال “ولاد القحاب” كايغوتو ” حگرتي عليهم حيت مافحالهمش” ” واش بغيتيهم يمشيو يشفرو” ” گول الله يحسن العوان راه بنادم ماعندوش البديل” وا ماعندوش البديل يجي يفرع ليا انا كري بالغوات ” ماطيشة ميا ماطيشة ميا” و يخلي ليا زبل الحوت حدا داري ! باشمن حق ؟!
– خدامة شفرات من الثلاجة ديال مولات الدار وفاش جات تشكى مولات الدار للناس بقاو عليها ولاد القحاب” مالكي على هاد الجوع ” ” خليها مسكينة كوراها تشهاتها” “مافيها باس الله يحسن العوان”
– ليفرور جايب عصير لواحد السيدة شرب منو و فاش لقاتو ناقص تشكات للبنات فالفايسبوك و ناضو ليها بنات القحاب ” لاشرب منو بصحتو” ” مسكين كوراه جاه العطش” ” سيري يا المجوعفة…”
و دابا؟ عرفتي شكون هوما ولاد القحاب دابا يا صفية يا بنت القحبة ؟
هوما هادوك لي كايتعاطفو مع المجرمين و الشفارة غي حيت مزاليط ! بغاو يعوضو ليهم داك النقص المادي بواحد النوع ديال الفشوش!” الفشوش الاجرامي”زعما لاكنتي مزلوط فالمغرب راه عندك كارط بلونش دير مابغيتي ! خالف القانون و دير الفوضى شفر و خون الأمانة و غاتلقا ديما جحافل ديال ولاد القحاب فصفك كايغوتو ” مافيها باس ” “مسكين ماعندوش” ” الله يحسن العوان ” ! أما لاكان الضحية شي واحد لاباس عليه ديك الساعة كايطلع عندهم منسوب الحقد الطبقي و ماكايكرهوش الضحية يسكت على حقو و مايطالبش بيه بتاتا ! خاصك تحشم طالب بحقك حيت لاباس عليك ! خاصك تصبر لاشفراتك الخدامة حيت هي ماعندهاش و نتا لاباس عليك ! خاصك تسكت لاشفرك الگارديان ديال الطوموبيلات حيت نتا صايگ طوموبيل ساوية الملاين و هوا ماعندوش و غاتسمع ” هانية تانتا فاش جاتك خمسة دراهم” “وايلي عطيه مسكين عشرة دراهم” ! خاصك تضرب الطم لاجاو مالين الكرارس دارو سويقة حدا دارك حيت نتا لاباس عليك و هوما ماعندهمش فين يخدمو ! غا حيت نتا لاباس عليك تساوي فنظر ولاد القحاب انك خاصك تلبدها و تسكت لاجار عليك شي واحد من “ولاد الشعب ” و دا ليك ديالك او بغا يديه ليك! واش نتا لاباس عليك و باغي تتشكى ؟ لاش غاتشكى ؟ لاش غاتحل فمك ؟ ياك عندك الفلوس و صافي خلي خوك المزلوط يتفشش عليك و يطلع ليك فوق راسك و يخرا حيت هوا مسكين مزلوط!
“ولاد الشعب” من حقهم يديرو شرع يديهم ! لاخالف القانون و شدو البوليسي مادايرش الكمامة و لا حارگ الضو و لا شافر ديال الناس كايخرجو ينبحو ولاد القحاب ” وا كاطبقو القانون غا على الدراوش ” ” وا سيرو شوفو هادوك لي شافرين البلاد ” ! ايوا سير نتا يا ولد القحبة تكلف بهادوك لي شافرين البلاد و خلي البوليس يتكلفو بهادو لي شافرين البيض ! بنادم كاتهضر معاه فالشرق و هوا مضروب بفردي خاوي كايجاوبك فالغرب !
راه الشفرة شفرة و الاجرام اجرام و الزلط و الجوع ماعمرهم ماكانو مبررات للافعال الاجرامية ! و كيما بغيتو القانون يطبق على لي لاباس عليهم خاصكم تبغيوه يطبق حتى على المزاليط و بدون هوادة!
و كيما قال الشاعر رضى الداودي في معلقته ” هيت غرباوي لعشاق الهيت ” المعلقة على اسوار اليوتوب ” واودي يا ودي ودي يا ودي ودي وا لي حصل يودي ! وا الملحة و القنب و تايصبح الحال” !
