سامي العلوي – گود //
سعيد قصابي المعروف فسطات كأقدم مصور وكان هو المصور الخاص ديال وزير الداخلية الأسبق ادريس البصري، مشى عند لاپيجي ديال ولاية الامن فالمدينة سمعو ليه فشكايتو لي حطها عند النياية العامة فالمحكمة الابتدائية بسطات .
مرادجي قال فتصريحو ل”گود” انو مغاديش يتنازل ضد البلطجة لي دارها مول الفو كونط المعروف بلقب “أوباما” ولي تعدى عليه.
وزاد مرادجي لـ”كود”: “البوليس تعاملو معايا مهنيين وحنا راحنا فبلاد المؤسسات وبلاد القانون ماشي فبلاد السيبة وانا عندي اليقين انو القضاء غادي ينصفني وانا مريض وفيا السكر وعندي شواهد طبية”.
وحسب مصادر “گود” فراه صحافي حتى هو حط شكاية عند وكيل الملك بالمحكمة الابتدائية ديال سطات وكيتسنى يعيطو ليه حتى هو لاپيجي.
البوليس غادي يعيطو على عدد من الاساتذة لي دايرين شكايات وعلى ضحايا تشهير آخرين منهم أستاذ جامعي فكلية المحمدية لي معرفش لحد الساعة علاش كيتم تشهير به فليفوكونط.
فخبر عندو علاقة بهاد الشي العميدة حسنة كجي عميدة كلية العلوم القانونية والسياسية بسطات حتى هي حالت شكاية دارها استاذ فشعبة القانون العام على انظار وكيل الملك من بعد حملة التشهير لي تعرض ليها.
هاد المدعو “أوباما” كتقول المصادر ديالنا انه رجعوه ريڤولي من إسبانيا وان لي واقف ورا هاد الشي لي كيدير هو منسق ماستر المالية العامة لي سدوه ليه بسبب الخنز ديالو ولي راه متابع قدام محكمة الاستئناف فسطات فملف الجنس مقابل النقط.
