وكالات //
كتب جورنال “لاديپيش” (La Dépêche du Midi) الفرنساوي، تقرير كيهضر فيه على الفرنساويين اللي كيبغيو يسكنو فالمغرب، وكيفاش ولاو هوما أكثر جالية أجنبية فالمغرب.
وقالت “لاديپيش” بللي المغرب كيوفر حتى فرص ديال الخدمة، وتكلفة المعيشة فيه رخيصة، وسياسة الضريبة كتشجع الواحد يستقر فالبلاد، هادشي علاش بزاف الفرنساويين كيجيو يعيشو فيه.
وسمات الصحيفة المغرب أرض “غروب الشمس”، اللي جا باش يعيش فيها حوالي 51 ألف فرنساوي، حسب السجلات القنصلية لعام 2021.
وزادت أكدات “لاديپيش” بللي أغلبية الفرانساويين اللي اختارو يعيشو فالمغرب استقرو فالمناطق السياحية والمدن الكبيرة اللي على السواحل.
وقالت نفس الصحيفة بللي حتى الجو كيلعب دور كبير باش يجذب الفرانساويين، وبللي تكلفة المعيشة أرخص بنسبة 40 فالمية من بلادهم فرنسا.
