عطا أخنوش إشارات على أن تعديل حكومي يقدر يكون فالمستقبل القريب: ملي تكون أحزاب الأغلبية مستعدة غنجلسو ونتافقو
هند لكلاوي كود ///
ناضت القيامة على كيلوط الممثلة منى زكي ففيلم “اصحاب ولا اعز”٬ النسخة العربية من “Perfetti sconosciuti” للمخرج الايطالي باولو دجيونوڤيسي.
فالفيلم الايطالي اللي خداتو “نيفليكس” ودارت منو لحد الان شي 40 “رومايك” منها هادا اللي شاركات فيه منى زكي ودار ليه الاخراج =او ما غير نقل اللي فالفيلم الاصلي= اللبناني وسام سميرة٬ فيه اللقطة اللي غادية قبل ما تخرج فيه واحدة من البطلات من دارها مع راجلها باش تعشى مع ازواج كيعروفهم لسنوات٬ غادية تحيد كيلوطها. كانت لابسة صاية.
منى زكي ف”اصحاب ولا اعز” دارت بحال “بيرفيكتوس دسكونوسيدوس” النسخة الاسبانية. حيدات الكيلوط فاول الفيلم. اما بطلة “اللعبة” فالنسخة الفرنسية فحيداتو باش وصلو لدار صحابهم اللي عارض عليهم للعشا: الطبيب الجراح والطبيبة النفسانية.
يعني زكي ما زادت ما نقصات. دارت اللي دار فالفيلم الاصلي. كلشي مكتوب وكلشي مقاد حتى على مستوى الاخراج. كيبقى الاجتهاد اكثر فالتشخيص. طبعا الاصل الايطالي ثم النسختين الفرنسية والاسبانية دارو فيهم الممثلين خدمة زوينة.
لكن اللي ما قدراتش ديرو النسخة العربية هي لقطة باش غادية تعرى فيها البطلة. هاد البطلة ماشي غير حيدات كيلوطها بلا ما تبين والو٬ ولكن غادية تعرى وتوري لكاع الازواج والصحاب اللي تعشاو التحت ديالها.
فالفيلم الاصلي والنسخ الفرنسية والاسبانية٬ غادي يصر الزوج للي سمع مكالمة مراتو مع “مجهول” كتعرفو فالفايسبوك٬ باش يعرف واش مراتو لابسة كيلوط ولا اللا. غادي يتبعها… هنا غادية توقف قدام كلشي وتهز الصاية ديالها وهي فحالة نفسية مدمرة كتهدر على زواج فاشل وزوج بارد.
مع “اصحاب ولا اعز” ما قدروش يديرو هاد المشهد. مريم الزوجة اللي جسدات الدور منى زكي مع راجلها شريف اللي لعبو الممثل الاردني اياد نصار٬ عوضات هاد المشهد بحديثها على حادثة سير دارت هادي سنوات وقتلات فيها مريم شي مواطن بطونوبيلتها وهي سكرانة وراجلها قال للبوليس هو اللي كان سايگ ودخل للحبس فبلاصتها.
مشهد ضعيف مقارنة فالفيلم الاصلي. خرج من واحد النوع من التكامل كان فالفيلم.
دابا تصورو كون كانت هاد اللقطة اللي دازت عادية فالفيلم الايطالي ورومايك ديالو الاسباني والفرنسي. كانت غادية تقوم القيامة.
دابا غير لقطة بسيطة ما بينات والو ودارت ضجة كبيرة.