عفراء علوي محمدي- كود//

قررات الحكومة تمدد العمل بالتدابير الاحترازية فكازا لمواجهة فيروس كورونا المستجد ل14 ليوم خرى، ابتداء من 5 أكتوبر الحالي.

وكيف سبق ل”كود” قالت سابقا، فالقرايا الحضورية فعمالة كازا غادي تبدا ف5 أكتوبر فجميع الأسلاك والمستويات، والمدارس غيحلو، والتلاميذ اللي ختارو والديهم يقراو فالمدرسة غيوليو يمشيو ليها، مع الحرص على الالتزام بمختلف التدابير الاحترازية المقررة والتتبع المستمر للوضعية الصحية فالمدارس.

وذكرات الحكومة، فبلاغ ليها، أن هذ القرارات جات “تبعا لخلاصات عمليات التتبع والتقييم المنتظم المنجزة من قبل لجان اليقظة والتتبع بعمالة الدار البيضاء، وأخذا بتوصيات اللجنة العلمية المختصة بضرورة الاستمرار في الإجراءات اللازمة للحد من تفشي فيروس كورونا – كوفيد 19”.

وسبق لمصادر “كود” من وزارة التربية الوطنية كشفات أن التعليم الحضوري فكازا غيبدا الاثنين الجاي، من بعدما تحسنات الوضعية الوبائية فالمدينة.

وحسب المصادر نفسها، فهذ القرار يقدر مايطبقش، ويستمر التعليم عن بعد فالمدينة، إلى وقع شي طارئ مفاجئ فهذ الأسبوع وبانو بؤر وبائية، حيت “كلشي متعلق بالحالة الوبائية دالمدينة واش غتبقة مستقرة أو لا”، حسب ما قالت نفس المصادر.

وكانت الأكاديمية الجهوية للتربية والتكوين قررات تسد جميع المؤسسات التعليمية من 7 شتنبر اللي فات، من ابتدائي وإعدادي وثانوي وجامعي، فالتعليم الخاص والعمومي وفالبعثات التعليمية الدبلوماسية، مع اعتماد صيغة التعليم عن بعد.