كريم الشركي-كود///

وزارة الصحة عندها شي قرارات مامفهوماش، مستشفى ميداني فبني ملال هادي مدة باش تصايب لمرضى كورونا، وطاقتو الاستيعابية كتوصل لمائة سرير، واخا الرقم ضعيف بالنسبة لجهة بني ملال، ولكن اللهم لعمش ولا لعمى.

هاد المستشفى دارتو الوزارة وخلاتو مسدود، وماتفتحش حتى ناضت عليه القربالة وناض البرلماني هشام الصابري كيساءل وزير الصحة، ولكن ملي تفتح بقى بحال يلا مسدود.

مصادر من بني ملال قالت ل”كود”، أن المستشفى كيعاني من شبه غياب للأطقم الطبية، وأنه مافيهش مراحيض داخلية، وخاص مريض كورونا يخرج برا المستشفى الميداني عاد باش يقضي حاجتو.

هادشي خلا أهالي المرضى بكورونا يتجمعوا وينوضوا يغوتوا، ليتدخل الأمن ويفضهم بالقوة.

الصابري لي بين على الغضب ديالو فتدوينة فالفايسبوك من هادشي، قال ل”كود”، أن الأمر غير مقبول باش يتفتح مستشفى ميداني ومافيهش أبسط شروط صون كرامة المرضى، لي هي طواليطات قراب، وفوق هادشي طلبنا دعم الأطقم الطبية، بعدما تصابو 15 بالمائة من الفرق الطبية فالجهة بكورونا، ولكن الاستجابة الوحيدة لي كانت من الوزارة هي أنها فتحات المستشفى الميداني.

الصابري وعد على حسابه الفايسبوكي انه غادي يخدم على هاد الموضوع، معتبرا أن ما يقع تآمر مع المصحات الخاصة لاستنزاف جيوب المواطنين.