الرئيسية > آراء > كيفاش ناس العدالة والتنمية مصدومين من انتصار لفتيت على بنعرفة. راه خرج النهار اللول من خيمة عوج وهادو اللي مقلقين ضربو بنكيران فظهرو وتخلاو عليه والنتيجة هاد التبهديلة راه لكل حاجة ثمنها
04/03/2021 10:00 آراء

كيفاش ناس العدالة والتنمية مصدومين من انتصار لفتيت على بنعرفة. راه خرج النهار اللول من خيمة عوج وهادو اللي مقلقين ضربو بنكيران فظهرو وتخلاو عليه والنتيجة هاد التبهديلة راه لكل حاجة ثمنها

كيفاش ناس العدالة والتنمية مصدومين من انتصار لفتيت على بنعرفة. راه خرج النهار اللول من خيمة عوج وهادو اللي مقلقين ضربو بنكيران فظهرو وتخلاو عليه والنتيجة هاد التبهديلة راه لكل حاجة ثمنها

كود هناء ابو علي///

قيادات فالبي جي دي مقلقين ومقلقات بزاف على “اعتماد القاسم الانتخابي على أساس المسجلين”. شي كيطالب بعدم المشاركة فالانتخابات المقبلة وشي باغي يخرج من الحكومة دابا وشي عبر على احتجاجو بطريقة اقل قوة. وزير الداخلية عبد الوافي لفتيت للي كان ضرب العدالة والتنمية باش كان والي على الرباط وتفرض على حكومة بنعرفة هو اللي خرج رابح. وزير داخلية ما عندو حتى شي حزب كيربح الحزب اللي ربح اللي جاب 125 صوت. علاش؟ حقاش هاد الشي كولو بني على اساس خاوي.

وزير الداخلية السابق ومعاه الوزير المنتدب ما خلاو ما دارو باش يربح الاصالة والمعاصرة فانتخابات 2015. لمقدمين والشيوخ والقياد ومسيرة ولد زروال والضغط باش يربحو بزز الياس العماري امين عام “البام”٬ وفالاخير فشلو. ربحهم عبد الاله بنكيران اللي كان رئيس حكومة ديك الساعة وامين عام حزب البي جي دي.

باش جا تشكيل الحكومة٬ تعطات لبنكيران مرة اخرى واخا عرف من نهار تعيينو باللي ما غاديش يديرها. غير هو سياسيا وقف البيضة فالطاس ورفض يدير تنازلات. ما خلاو ما دارو ليه ورفض مشاركة الاتحاد الاشتراكي فالحكومة. رفض استوزار شي وحدين. كان غادي يرفض استوزار امثال لفتيت فحكومتو.

بنكيران اللي ربح حزبو الانتخابات وضارب تعرض لاول طعنة غادرة من حزبو. تخلاو عليه باش تعين بنعرفة. وقع تحالف غريب ضدو من حزبو. كلشي قادة هاد الحزب وقادة الاصلاح والتوحيد تحالفو باش كل واحد دخل شوية الموس فظهرو. طبعا كلشي بثمنو. ولاو وزارا. اللي كيعرف بنكيران ديك الساعة كان متأكد ان كل من عزيز الرباح ولحسن الداودي ومحمد يتيم والحقاوي ونجيب بوليف ما غاديش يقبلهم يكونو وزرا. بالنسبة ليه هادو ما فيدهمش وما يستحقوش يكونو مسؤولين حكوميين.

هادو اللي كيغوتو دابا كلهم ساهمو فطعن بنكيران. ساهمو فضربو. ساهمو فخيانتو. غير بدا بنعرفة وقبل كلشي اللي رفضو بنكيران.
من ذاك النهار وقضية بعد قضية كيحدرو الراس ناس البي جي دي. كيقبلو. ولات الحكومة كيتحكم فيها لفتيت. كيتحكم فيها حقاش شخصية رئيس الحكومة ما كايناش.

هادوك اللي كانو ضد بنكيران مع الوقت ولاو مضاربين بيناتهم. الرميد لعب اهم دور باش يوصل بنعرفة للحكومة وشفنا السيمانا اللي فاتت استاقل احتجاجا عليه. زاوگ بنعرفة واتصل الملك باش يتراجع عن الاستقالة. اما هادوك اللي كانو مع بنعرفة فاللول٬ جراو على كثير منهم من الحكومة: يتيم والداودي والحقاوي… باعوهم لعجل. اذن ما يجيوش اليوم يبكيو. هما كانو عارفين هاد الشي نهار باعو بنكيران على مناصب. د ابا خاصهم يزمو فامهم.

موضوعات أخرى

28/03/2024 22:35

اشناهي المواد الغذائية الفاسدة اللي تشدات ف15 يوم درمضان؟ 402 طن فيها 106 من التوابل و60 طن من العصير و35 طن من لحليب و34 طن من السكر واتاي

28/03/2024 22:30

لشكر شتت تنسيق المعارضة.. زرب على بنعبد الله وبنكيران وأوزين وعلن رسميا باسم المعارضة على ملتمس الرقابة

28/03/2024 22:00

الأمير هشام العلوي عطا محاضرة فمعهد الدراسات السياسية فباريس على دور السياسة فالتقدم الاقتصادي فمنطقة الشرق الأوسط و دار مقارنة بين الانظمة ديال الخليج و ديال شمال افريقيا

28/03/2024 21:30

ضوسي السمسرة القضائية.. غرفة الجنايات بكومناف حكمات على عصابة ريبكو ليفها قضاة ومحامين وسماسرة بالحبس والغرامة

28/03/2024 21:00

يكذب الإسلامي وهو يتحدث عن تفكك الأسرة في الغرب! نحن روحانيون وأسرنا متماسكة وأطفالنا يكبرون في الشارع بعناية إلهية

28/03/2024 20:30

لاگوارديا سيپيل شدو جهادي صبليوني من أصل مغربي نشر رسائل مشفرة لدعم داعش وشروحات حول كيفية تصنيع المتفجرات

28/03/2024 20:00

الهاكا عطات دروس لـ”مومو” وهيت راديو: خاص احترام نزاهة البرامج وتكون مضامين اعلامية آمنة ويقظة و”المبادئ والقوانين” ماشي ترف

28/03/2024 19:30

جبن وزير النقل. سولوه على التطبيقات قال ليهم خاص موافقة الطاكسيات الكبار والصغار واخا شي وحدين مشوهين البلاد – فيديو