كود تطوان///

مدينة تطوان لي رتافعات فيها عدد الاصابات فالايام الاخيرة، ساهم فيها حسب مصادر كود، سيدة اعمال دارت افتتاح لمقهى ديالها فمدينة مارتيل.

وقالت مصادر كود أن هاد السيدة دارت افتتاح للمقهى ديالها والسلطات غمضات عينيها رغم أن الامر ممنوع، وبعد أيام على الافتتاح اكتاشفات اصابتها بفيروس كورونا.

الامر ماوقفش عند هاد الحد بل تعداه إلى إصابة اقاربها،بينهم امها وجدتها، بالاضافة الى صحاباتها لي حضرو لحفل افتتاح القهوة ديالها، واللي السلطات غمضات عينيها عليه حقاش راجلها بوكو لعاقة وعندو معارف ديالو.

هاد السلطات هي نفسها لي ناضت دابا كتطبق القانون على الناس وكتعتاقل اي واحد مادايرش الكمامة، فالوقت لي كان خاصها طبق القانون على هاد مولات القهوة لي دارت حفل افتتاح وجلطات الناس بكورونا.