هناء ابو علي كود كازا ///

هاد النهار نشرنا خبار على فضيحة فبلاد كتحتارم راسها وهي تخصيص دقيقة و25 ثانية فنشرة رئيسية ل”دوزيم” لنشاط ديال الزعيترات اللي عندهم ماضي اجرامي فالمانيا.
اكتشفنا ان “الاولى” قالت ل”دوزيم” ما تعرفيش. عطاتهم 3 دقايق وشي عشرين ثانية. اييه ودارو نفس النشاط اللي قدموه انو عمل خيري لشي جمعية باسمهم.

مقدم النشرة دار مقدمة غزلية فالزعيترات بوبكر وعثمان. قاليك “نجوم وابطال يسكون قلوب المغاربة ماشي غير بانجازاتهم بل كذلك في العمل الانساني. النموذج مع الاخوة زعيتر”. اييه طبعا كذوب حقاش لمغاربة ما عمرهم سمعو بهادو حتى شافوهم واحد النهار خداو وسام ملكي.

من بعد شفناهم كيتلاحو فكلشي. وصلات بيهم الوقاحة وصلو حتى للصحرا ودارو ماتش فمنطقة وقضية ما عندهم علاقة بيهادابا هاد الزعيترات اللي قدماتهم قائمة بلعوشي الصحافية الرياضية “نجمان” فالعمل الانساني٬ دارو نشاط غير مرخص به فسيدي يحيى زعير. دارو تجمع فوقت ما مسموحش بيه التجمع وفق حالة الطوارئ الصحية بسباب الجايحة كورونا٬ ثم بيناتهم الاولى فالفيديو اللي فهاد المقال٬ كيتشبهو بسيدنا. اييه كيوزعو الگفاف وكيجيبو ناس فقرا كيقولو بلا بيهم كنا ضعنا وعاونو ولادنا وووو

هاد النشاط قالو داروه مع شي جمعية هولندية. ما كنعرفوهاش وما كنعرفوش منين جابو لفلوس٬ بحال فلوس ابو زعيتر واش كلها من الرياضة. حقاش لمغاربة ما عندهمش بيهم شي معرفة بيهم

المشكلة لكبيرة ان قنوات القطب العمومي كتبيض تاريخ وحدين عندهم ماضي اجرامي. السلطات كتفرج فنشاط غير مرخص وفتجمع مخالف للقانون اللي كيتطبق على كاع لمغاربة هاد ليام. هادو غير فنشرات الاولى ودوزيم عطاوهم 4 دقايق و45 ثانية. بلا قنوات اخرى. هادو غير جوج قنوات ديال الدولة. تغطية لنشاط غير مرخص