كود احمد الطيب ///

رئيس حكومتنا بنعرفة اللي طلع فبلاصة بنكيران كيخربق كيف عادتو. البارح فلقاء حزبي باكادير قال باللي المغرب رفض صفقة القرن. كرر بنعرفة اللي كان افشل وزير خارجية فتاريخ وزراء خارجية محمد السادس٬ بان الملك عبر رسميا على رفض اي تصفية للقدس وان هاد القدس خط احمر وانه :”لا يمكن أن نقبل بجميع محاولات تصفية القضية بكل تسمياته من صفقة القرن”.  وقال المتحدث “الملك عبر رسميا برسائل إلى الرئيس الأمريكي وإلى المنتظم الدولي عن رفضه لأي محاولة لاستهداف القدس”.

دابا رئيس حكومة كيدير الخلط. كاين الامر الواقع اللي دارو الرئيس الامريكي دونالد ترامب واللي حول مقر سفارة امريكا الى القدس وتبعوه شي دول وكاينة صفقة القرن اللي خدامة فيها الامارات العربية المتحدة والسعودية. 

المغرب استقبل جاريد كوشنير كبير مستشاري ترامب ونسيبو فرمضان اللي فات. فطر معاه الملك ووزير خارجيتو ومستشارو فؤاد عالي الهمة. بنعرفة ايلى قال باللي المغرب رفض هاد الصفقة خاصو يكون فطر مع الملك. طبعا ما حضرش. 

ثم حكومة بنعرفة حضرات لاجتماع خصص لهاد الصفقة فالبحرين من خلال مسؤول بوزارة المالية. اي ان بنعرفة رسل واحد منو لاجتماع كيقول قدام صحابو فاكادير انو ضدو. وباش انت ضدها علاش رسلتي مسؤول فالمالية. 

صفقة القرن مازال ما هدراتش على الشق السياسي. كولشي عارف هاد الشي. دابا كيهدرو غير على الشق الاقتصادي. اي انك يا بنعرفة كتغلط الراي العام وكتوظف قضية فامور حزبية ضيقة