كود هناء ابو علي كازا ////

اليوم فالعشية غادية تنظم المديرية العامة للامن الوطني استعراضها السنوي بالاكاديمية الملكية للشرطة. قبل هاد الشي بساعات خصصت حلقة “ضيف الاولى” على “الاولى” اللي كيقدمها هاداك اللي فشي شكل بلا ما نقولو كلام اخر تيجيني لهاد المناسبة. استضفات بوبكر سابيك الناطق الرسمي باسم المديرية العامة للامن الوطني ومديرية مراقبة التراب الوطني =الديستي=. الاسئلة كانت عيانة والمحاور كان ضعيف بزاف ولكن الضيف كان هو المفاجأة. ماشي حقاش البلاطو فيه غير رجال الامن ولكن حقاش عندو فصاحة. كيهدر مع لمغاربة بلغة كيفهموها. كيعززها بارقام ومعطيات. اكثر من ذلك طيلة ساعة ونصف كان حريص جدا جدا على وضع المواطن المغربي في محور اهتمام كاع استراتيجيات المدير العام عبد اللطيف الحموشي.

الحموشي عندو مخطط فهاد الجسد الكبير اللي ماشي غير كان مريض قبل 2015 بل كان بدا كيحتاضر. رجع فيه الروح بانسنتو. حبب المواطن للبوليس. طبعا كاينة استثناءات كاينة مشاكل. ماشي ف3 سنين كلشي غادي يتقاد. لكن امور كثيرة طورات.

كيف قال الناطق الرسمي البارح فالبلاطو راه لا تنمية بدون امن ولا امن بدون حقوق الانسان. راه كيتحول لعنف ايلى حيدنا حقوق الانسان. الانفتاح على المحيط على المجتمع الوطني. احترام القانون احترام الدستور. هادي هو وجه البوليس فعهد عبد اللطيف الحموشي. طبعا مع الحكامة الجيدة والشفافية عبر محاربة الفساد اللي كان كينخر فهاد الجهاز. باش جا عطى للجميع فرصة باش يدخلو للصف ومن بعد اللي تورط فقضايا فساد يخلص.

هاد الرسالة ديال ان الامن يخدم المواطن وان الامن راه خاص كلشي ينجح فيه وبالاساس المواطن. رسالتو اللي كررها بزاف البارح وباساليب مختلفة ووجها للمغاربة. راه البوليس ديالكم وانتوما اللي ممكن تحميو امن لبلاد وحنا راه غير باش نخدموكم. مصالحة يستحيل شي حد حتى يتصورها هادي سنوات قليلة.

لكن علاش هاد الصورة؟ هاد الصورة مرتبطة بشخص المدير العام. كيخدم بزاف بزاف. عزيز عليه خدمتو بزاف بزاف. وقتو حياتو كلها للخدمة. غادي بريتم طالع بزاف. معاه فريق كيخدم بحالو. محزم بناس قافزين وكيموتو على خدمتهم. هاد الشي علاش كيبان خدام اكثر من لخراين حتى شي وحدين ولاو كيطلبو يكون حموشي فالداخلية وحموشي فهاد الوزارة وحموشي فوزارة اخرى. طبعا كاينة مؤسسات اخرى فالبلاد فيها ناس كيخدمو مزيان. لحسن حظ هاد لبلاد

خرجة البوليس البارح فالتلفزيون مرحلة جديدة فهاد المديرية. مع هاد المدير. هو ديجا غادي بسرعة كبيرة فخدمتو ودابا غادي يكسيري فبلاد بزاف غادي بالبروميار