كود مدريد ///

مع الخمسة ونص تقريبا بالتوقيت الاسباني =3 ونص التوقيت المغربي= كانت هاديك نزهة ممثلة شركة “اس تور” المكلفة بالطراسبور والاقامة للاسود٬ كدور قدام اوطيل “اورو سطار” اللي كاين فشارع “لا اسبانيولا” بمدريد. باقي ساعات لانطلاق مباراة المغرب والبيرو الودية بملعب اتلتيكو مدريد. 

هاد نزهة بلا حيا بلا حشمة زايدة فيه ولابسة سورڤيت المنتخب المغربي. عندها بادج بحال ايلى من الوفد الرسمي وخدمتها هي تقلب على فين يسكن الاسود وكيفاش يتنقلو. 

كدور بوقاحة بحال شي مسؤولة فالجامعة الملكية المغربية لكرة القدم. شركة “اس تور” يالله جددات مع الجامعة للمتتخبات الوطنية. لكن فاول مهمة خسراتها هاد الشركة. علاش؟

اولا فضيحة داك المستخدم اللي سب الاسود وعبرها “المورو” عندها فيها مسؤولية هاد لالاهم نزهة. مهمتها ماشي تصور مع اللعابة وتاخد تونياتهم وتوريهم فيديوات. الللا. خدمتها النقل والاقامة. باش تختار اوطيل خاصها تعرف اش تختار. 

هاد السيدة اللي خدامة فشركة كيقولو معروفة ختارت “اورو سطار” وهي عارفة والدولة المغربية عارفة والسلطات المغربية عارفة باللي هاد الشركة سبق وكان ضحيتها جوج رجال اعمال منهم مول البارود اليوسفي اللي كان بوه خدام مع ادريس البصري. 

وفق ما عملته “كود” فاورو سطار دخلات للمغرب باسم شركة “اتوزا”. كان عندهم اوطيل اسمو “اورو سطار” فطريق المطار فكازا والثاني فحي گوتيي حدا توين باسم “ايكيس”. 

حسب مصدر “كود” هادو داو لجوج مستثمرين مغاربة تقريبا 3 مليار “كيدخلو للبلاد وكيدرو شركة مغربية. كيتعاقدو مع صحاب لوطيلات. كيدخلو لاربيطراج ففرانسا او بريطانيا. كيكريو من عندك لوطيل وكينصبو عليك فعام ونص او عامين وكيمشيو” يوضح مصدر “كود”.
اليوسفي مول البارود خلاو ليه حتى الخدامة فعنقو

دابا شركة بحال هادي. عندها سمعة فالسوق. من المفروض هاد “اس تور” تعرفها. ما يمكنش تجي لمدريد وتكري عند هاد الماركة. ماركة اللي من غير نصبو علي لمغاربة سبوهم بسباب دينهم كيف دار مستخدم. 

دابا هاديك لالهم نزهة خاص اللي يبعدها على المنتخب. يبعدها على اللعابة ويحاسبها على اخطاء بحال هادي. فمدريد كاين فنادق صغيرة تكفي للمنتخب ما محتاجاش اوطيل كبير بزاف ومترع وكلشي داخل خارج