محمد سقراط-كود///

أغلب المغاربة عارفين موقعهم في الخريطة وقانعين بيه وعايشين وفق حقيقة أن المغرب ماشي دولة وعظمى وماشي دولة ديال طايب وهاري، حنا بين وبين بحال في كولشي، وأغلب المغاربة كانو عارفين وقانعين أنه بحال أي حاجة جديدة في هاد الحياة راه كتسبق من العالم الأول عاد كتوصل لينا، وحنا كشعب مكانش عندنا موشكيل نتسناوهم حتى يكملوه هوما عاد تجي نوبتنا حنا، غير هو كان عندنا موشكيل إلى سبقونا دول مقودة عليهم كثر منا، وماشي حتى يسبقونا عن إستحقاق وإنما غير بسباب غباء أو لا مسؤولية المسؤولين ديالنا، قبل مايبدى يتصنع اللقاح وغير تجبدات الهدرة عليه، كانو أغلب المغاربة عارفين اننا مستحيل نلقحو مع ألمانيا وميريكان واوروبا عموما واليابان والدولة المرفحة في نفس الوقت، غادي نتسناوهم يبداو ونتبعوهم بحال في أي حاجة، هذا موقعنا وحنا راضيين بيه.

شوية بداو علينا بهاحنا غادي نكونوا من الدول اللولة لي غادي توصل باللقاح، غادي نبداو اللقاح في دجنبر، وزير الصحة دابا باقي مابدى التلقيح وهو قال أنه غادي ندوزو رمضان العام الجاي عادي كأن شيئا لم يكن، كثروا علينا بهاد الطلقات والخرجات حتى بصح ولينا متيقين أننا في مصاف الدول العظمى، وحنا في الحقيقة معولين على دولة فيها مليار والصرف تبيع لينا اللقاح، وكل مرة كتسمع هدرة في شكل، والنتيجة شهر واحد قريب يسالي وشي لقاح ماشفناه، وشي تواصل مكاين، لدرجة بنادم بدا يفقد الأمل فأننا نكونوا حتى مع الدول المتوسطة لي غادي تلقح شعبها، ويقدرو يفوتونا دول مقودة عليهم كثر منا، ويبقى فينا الحال ونحسو بالشمتة حيت قولبونا المسؤولين ديالنا بدوك الخرجات العبثية ديال ها اللقاح في الطريق، ها هو وصل هنا هاهو وصل لهيه.

نهار سمعت داك راه حنا غادي نكونوا من الدول اللولة لي غادي تبدى التلقيح ماتيقتش، جاتني غريبة اننا غادي نكونوا مع الدول لي عندها الفلوس والعلماء والمصانع والكفائات والشركات الكبرى، ولكن هاد العام أصلا  كان إستثنائي وبزاف ديال الحاجات مكناش منتاظرين البلاد تديرهم دارتهم ونجحات فيهم وبهراتنا كاملين، لدا قلت مع راسي راه تاهادي تقدر تصدق، ولكن للأسف ماصدقاتش وكان الأمل ديالي فانني نمشي نشوف واليديا هو انهم يتلقحو فهاد الشهر او الشهر الجاي حيت ملي بدات كورونا ماشفتهم، ساعا جاتهم كورونا وبراو واللقاح باقي ماوصل، كون غير قلتو لينا من اللول شوفو راه حنا المغرب دولة بين وبين غادي نتسناو الدولة لمرفحة تلقح وإن شاء الله نكونوا حنا من الدول اللولة لي تابعاهم، وراه غادي نبداو التلقيح العام الجاي، داك الساعة المغاربة نفسانيا غادي يكونوا موجدين لهاد التأخير، ولكن للأسف الحكومة ملي يالله شعلو الضو في مختبرات سينوفارم بداو علينا ها اللقاح جاي ، هاهو مع الدورة، ها هو وصل لسيدي قاسم، وشي لقاح ماشفناه.