كود الرباط//

الفاعلين فقطاع السياحة كيتسناو قرار فتح الحدود، كولشي على اعصابو، مبقاوش باغين لا دعم ولا والو. باغين غير الحدود يتفتحو.

صاحب وكالة أسفار كيخدم مع السياح الأجانب بمختلف دول العالم (اوربا، امريكا، امريكا اللاثينية) قال لـ”كود” بلي الحاجة الوحيدة لي باغي دبا فهاد الظرفية هو فتح الحدود، مضيفا :”انا قادر نوقف على رجلي وداير خطة لراسي نعاود نجلب السياح ونقنعهم يجيو المغرب ومايمشيوش للامارات ولا مصر ولا تركيا”.

صاحب الوكالة لي فضل عدم ذكر اسمو لأسباب عندها علاقة بالاحتجاجات لي منوضة الجمعية الوطنية لوكالات الاسفار، أوضح لـ”كود” بلي :”لي كيبغي بلادو كيتقاتل ويخدم وعامين ديال الافلاس مغاديش تخلعنا”، مضيفا :”واخا الحكومة مدارتش معنا الواجب كيف دارو دول أخرى، لي عفات الفاعلين فقطاع السياحة من الضرائب، حنا دارت لينا استثناء عكس الفنادق، بالرغم حنا لي كنجيبو الكليان لهاد الفنادق”.

وكانت “كود” نشرت قبل أيام، بلي غايكون لقاء حاسم ديال اللجنة العلمية يوم غد الثلاثاء، تزامنا مع توقعات بفتح الحدود ابتداءا من فاتح فبراير المقبل.

الوضعية الوبائية فبلادنا باقا متذبذبة، خصوصا وانه كاين تفاوت بين الجهات في المؤشر التصاعدي ديال الاصابات، بحيث مثلا جهة كازا بدات كتهبط فالمقال جهة سوس كاطلع وجهة الرباط وفاس كذلك.