كوكا كولا دارت يدها مع المؤثرين ديال انستكَرام باش يستغلو رغبة الناس فالخروج من بعد رفع الحجر الصحي
أسماء غربي-كود//
الاستغلال لي كينهجوه بزاف ديال المؤثرين على مواقع التواصل الاجتماعي خايب، والأخطر فيه أنه كيستحمرو شعب متبعهم فقط باش يربحو لفلوس، الطريقة، وعلاش وكيفاش ماشي سوقهم.
واحد الحملة دارتها شركة كوكا كولا ومدخلا فيها بزاف ديال المؤثرين في انستكَرام كيطالبو فيها الناس باش يخرجو من العالم الافتراضي للواقع من بعد الحجر الصحي، وحتى لهنا ما كاين حتى مشكل.
المشكل هو ان هاد المؤثرين مستغلين المتتبعين ديالهم، وحطو فيديوهات وصور عادية وممكن أي واحد يشوفها يقول راه مبادرة خاصة، في حين ان الصحيح أنهم مخلصين عليها بالفلوس، وهادشي كامل يعتبر استغلال.
علاش قلنا استغلال، إلا كانت الحملة ديال شركة كوكا ولا أي شركة أخرى، حيت ما عندنا حتى مشكل مع كوكا، (إلا كانت الحملة) بنادم مخلص عليها، راه على الأقل خاصو يحط اسم سبونسور ديالو ماشي يكتبو صغير تحت الفيديو بقصد حتى واحد ما يشوفو، بحال كيف دارو هاد المؤثرين، وزادو هاشتاگ #cococola و#b7al_jamais.
هاد الحملة دارو فيها المؤثرين مجهود باش بكل بساطة يكذبو علينا، ها لي مشا لفيلا باش يصور، ها لي خدم علينا الدراما، ها لي جابت مصور باش يشد ليها تصيورات، وهادشي كامل طبعا مخلصين عليه، وطبعا ماشي مشكل يتخلو، غير هاد المرة يقولو لينا بوضوح هاد الحملات ماشي أفكارنا.
هاد الكلام موجه للمؤثرين والشركات حتى هي لي اعتمدت طرق جديدة ديال الإشهار، الإشهار ما كيكونش بطريقة تستغبي الناس، بالعكس قوللنا راه إشهار وغادي نقولو ليكم شكرا لأنكم فكرتوا فينا.