كود ياوندي ///

واش اللي كيسمي راسو الظلمي وكيقدم راسو رمز المشجعين لمغاربة يستحق هاد اللقب. يستحق يكون بحال “مانولو” فاسبانيا؟ هاد السيد وصل قبل ماتش المغرب ضد غانا لياوندي. اول حاجة دارها مشى يسعى فسفارة المغرب. بغباء وما مفهومش السبب عطاوه لفلوس. كيقول ليهم كنمثل المغرب وغمق عليهم. عطاوه شي حاجة قليلة ولكن عطاوه. من بعد دار عند ديبلوماسيين اخرين وبدا يحيح عليهم. هو عايش فاوربا وبهاد الصفة وصل لياوندي.

دابا واحلين فيه. حتى باش عطاوه يسكن مع مغربي اخر جاي يخدم فياوندي. باغي يكون حلاق. رفض يسكن. باغي اوطيل. تماك لوطيل الرخيص اللي يمكن يسكن فيه الواحد كيوصل حتى 150 دولار اي تقريبا شي 1400 درهم.

من حق اي مغربي يشجع المنتخب. يدافع على المنتخب. يسافر مع المنتخب. يعشق المنتخب ولكن هاد العشق ما خاصوش يكون بالطلبة. عشق ترجعو ريع. تمشي وخاص كلشي يخلص عليك.

تصرفات بحال اللي دارها مسؤول فالوفد المغربي ليلة عشرة يناير فاحد المطاعم واخا نيتو مزيانة٬ ما خاصها تبقى. بان ليه هاد “الظلمي” داخل لمطعم غالي. ناض خلص عليه. هادا راه تشجيع ليه ولغيرو.

واش ممكن تسيدانتيفيا فهاد المشجع؟ ما يمكنش. حقاش القيم اللي كيقدر يدوزها مبنية على الريع.

علاش هاد الشخص ما يتعلمش من “مانولو” ديال اسبانيا. عندو سبونسور ديالو. مكلف بتنقلاتو مع طبلو. كيديرو عليه الربورطاجات. كيعطي صورة زوينة على بلادو. ما عمرك تسمعو يطلب. ما عمرك تسمعو يتشكى. كل كلامو على عظمة اسبانيا وعظمة ثقافتها وعظمة تاريخها وحضارتها.

خاص الانتهاء من امثال الظلمي كيهد بالاحتجاج اليوم كيف علمات “كود”٬ امام السفارة. شفتو فين وصلنا بالطلبة.

هاد الطلبة دايرها حتى شي شبه صحافي ولى مختص فالمناسبات الرياضية. غير وصل حتى هو قبل الماتش بساعات وهو يمشي كيدور على الديبلوماسيين لمغاربة. باغي المساعدة. حسب ما علمته “كود”٬ الجامعة الملكية لكرة القدم ما غادياش تكرر خطأ “كان” مصر. ما غادياش تعطي للصحافيين هاديك الف دولار اللي عطاتها ليهم وما خداهاش كلشي بسباب مواقفو من هاد الطريقة فالتعامل مع الصحافة.

كاينين صحافيين و صحافيات كيخدمو مزيان ولكن كتجي هاد الحوتة كتخنز شواري الصحافيين. بدا بالطلبة. بالسعاية. خاص النقابة الوطنية والجمعيات المتخصة فالصحافة الرياضية تخرج بيانات ضد هاد الطفيليات.

خاص حتى الجامعة تخدم بتنسيق اكثر مع المجلس الوطني للصحافة مع النقابة الوطنية للصحافة مع الجمعيات الخاصة بالصحافة الرياضية اللي معقولة ماشي اللي عاطياها للتبزنيز.

بعيد على هاد العينات. فهيلطون بياوندي للي فيه مقر الكاف فهاد الكان ممكن تكون كيدور وتلاقى مع رئيس القمر مع مراتو وسط حراسة امنية. يقدر يوقف لثواني ويسلم على اللي سلم عليه بادب. هاد الرئيس هو الوحيد اللي حضر لهاد الكان. جا يشوف فرقتو اللي فالمجموعة اللي فيها المغرب. لفراقي بجوج كاينين فنفس لوطيل “مونت فيبي” بياوندي.

فنفس لوطيل كلشي كيعرف كلشي. رئيس اتحاد الجزائر لكرة القدم تقدر تلقاه مع رئيس الاتحاد المصري لكرة القدم مع ناس الجامعة الملكية لكرة القدم. كيسولو على بعضياتهم. كيسولو علي كيفاش دايرة الاستعدادات علي وضعية الصحافيين اللي تعرضو للكريساج فدوالا. طريقة الكلام والحوار ضد داك الشي اللي كيروج ليه تبون وصحابو فالجيش. بصاح “خاوا خاوا” واحترام كبير.

اللي مؤثر علي هاد البدية ديال البطولة هي الحرارة اللي ناقصة فالتيرانات. حرارة المشجعين. فماتش المغرب الحضور كان قليل بزاف. فماتشات خراين نفس الشي. الثمن اللي دارو بيه التذكرة غالي على قدرة الكاميرونيين. بقاو التيرانات خاويين. الدولة الكاميرونية ما هامها الا الافتتاح. جا الرئيس وبعد غالبا يقدر يمشي لسويسرا للي تقريبا عايش فيها٬ حضر للحفل. هو تزكية ليه ولنظامو. سالات الحفلة.

الباقي عندهم تفاصيل. صحابو دارو المارشيات. دورو الحركة. لقاو بگرة الكان وحلبوها مزيان. يدخل الجمهور ولا ما يدخلش. هادوك غير تفاصيل.

الكاف خاصها تلقى حلول فقضية فراغ المدرجات. ماتشات فاجواء حارة وبتيرانات خاوية خايبة بزاف.