هناء ابو علي كود كازا///

غتكون اليوم الاثنين، فالمحكمة الزجرية دعين السبع فكازا، جلسة ثانية جديدة من جلسات محاكمة الملايرية ال12 اللي كانو تشدو بتهمة خرق حالة الطوارئ الصحية واستهلاك المخدرات الصلبة، وكاين منهم حتى المتابعين بتهمة الفساد.

وحسب مصادر “كود”، فغير واحد فيهم اللي متابع في حالة اعتقال، فيحين كَاع ال11 لخرين خداو سراح مؤقت، وهذا اللي بقى مشدود هو مول لابارتوموت اللي كانو الملايرية سهرانين فيها، واسمو (حمزة ش.).

ولقاو البوليس عند حمزة قراعي دالشراب، بعدما قلبو لابارتومون ديالو، كيف لقاو عندو المخدرات، لكن مصادر مقربة منو كتقول أنه غير خداها من عند شي صحابو وهو فالأصل ماكيستهلكهاش، وأنهم زيرو الخدامة ديالو حتى عتارفات بشي حوايج ماكيناش.

المتهمين منهم سعودية مغربية معروفة ملقبة ب(د.)، كذلك كاين سعودي زوج ملايرية مغربية اسمها حنان، واللي كتقول مصادر “كود” بأنه تخبى، وكانت معاهم حتى مغربية يهودية الديانة مرفحة هربات ومنعات من المتابعة، والمصادر قالت أنه لقات اللي يهربها فاش وقفو عليهم البوليس.

وكانو تشدو الملايرية هذ الأيام فالجردة ديال اللوتيسمون فين ساكن حمزة، مع شي 3 دالصباح، فالجردة كاع

وتشدو الملايرية وفق شكاية داروها صحاب العمارة اللي ساكن فيها حمزة، اللي باقي مشدود، بسبب الصداع فالليل، والفساد.