نجوى المالحي-كود//
من بعد غياب دام أشهر من قانتها على يوتوب، رجعات الكوميدية كوثر بامو بفيديو جديد وقدرات تشد بيه البلاصة اللولة في الطوندونس المغربي وتضرب مليون مشاهدة في 24 ساعة.
الفيديو وثقات فيه بامو رد الفعل ديال باها وختها وحتى ماماها بعدما شرات للاب ديالها طوموبيل وقررات تعطيها ليه كادو وتحقق ليه الحلم ديالو.
كوثر كانت قالت في فيديوهات فايتين أنها باغة تحقق لعائلتها داكشي لي مقدوش عليه، والطوموبيل لي شراتها لباها كان كيحلم بيها هادي مدة طويلة.
ختها الكبيرة أمينة بكات ملي عرفات، وباها تفاجئ لكن الام ديالها مدارت حتى شي رد فعل وقالت ليها أنها كان خاصها تتشاور قبل ما تشريها.
