جمال بناصر – كود//

الفكر الداعشي و الرغبة ف تذوق الدماء ماكايناش غي عند الخوانجية بل تسكن بعض الرفاق ايضا… طبعا هاذشي لا يمكن تعميمه على الجميع ولكنه راه كاين عند بعض المحسوبين على اليسار، و مايمكنش ندفنو الراس ف الرملة و نقولو: “لااا هاذشي ماكاينش .. حنا دعاة التنوير و التحرير و الحق في الاختلاف”…

أما الدليل على ذلك فيأتيك شي رفيق، ناقص عقل و تكوين، باش يخليك تخاف على اليسار و البلاد و تخاف على راسك و وليداتك، بحال شي “كاماراد” سخن عليه راسو و خرج يهدد عددا من الإعلاميين بالموت و الشنق في الساحات العامة.

الرفيق اللي واقيلا يالله قاري شي كتيبات ديال ماركس على الريق بلا مايفرش ليهم بما يلزم باش مايجيهش مغص ايديولوجي، نصب نفسه قاضيا باسم الشعب و اصدر احكاما بالموت في حق كل من يونس دافقير و المختار الغزيوي و رمضان رمضاني، متوعدا هؤلاء جميعا بالموت شنقا، خاتما حكمه بعبارة “عاش الشعب” التي بات يمتطيها كل من لم يجد مطية.