مصطفى الشاذلي كود ///

مشكلة الناس هي المشاعر والتموقع فمواقف عاطفية فقط باش تبرر وشي تصرفات غير رياضية، بدعوى التضامن مع المحكور والفقير واللاعب الوطني، هي موضة تبلينا بيها منذ مدة غير قصيرة، مفيها تا شي حكم رياضي و لا انضباطي، اللي كيهم فيها هو التعاطف مع اللاعب المحلي حتى وإن كان ظالما.

حالة حمد الله ماشي حالة جديدة، شفنا دائما ضغوط باش يتم استدعاء اللاعب الوطني، وضغط من طرف فئة من الجمهور باش يمشي لاعب اللي تألق ولو شوية. نرجعو نتفكرو الصيف اللي داز والضجة ديال عيطو لأيوب الكعبي، ضغط الجمهور ( ويمكن حتى شي مسؤولين) خلانا نلعبو بالكعبي أساسي فالماتش اللول، واللي بين على مستوى باهت وضعيف، وجهل تا بأساسيات التمركز قدام المرمى وضيعنا فرص معاه مكتضيعش.

نرجعو لحمد الله اللي ماشي جديد على المنتخب وماشي جديد على هاد التصرفات، تقنيا حمد الله قدم هاد الموسم أحسن موسم فالمسيرة ديال وبأرقام قوية، لكن هادشي دارو فالدوري السعودي اللي المستوى التقني ديالو وإن كان يسمى بدوي المحترفين فهو هاوي وضعيف، والقوة البدنية فيه متدنية. مع ذلك فالدوري السعودي لعبو فيه لاعبين مغاربة كبار وقدمو للمنتخب بزاف منهوم بصير والبهجة وكماتشو وهوما اللي فتحو الباب للمغاربة باش يلعبو فالسعودية بزاف، لكن هاد اللعابة باستثناء البهجة معمرنا سمعنا عليهم شي مشاكل ديال الإنضباط ولا الخروج عن النص، عكس حمد الله.

بداو مشاكل حمد الله مع بيم فيربيك اللي مستدعاهش لأولمبياد 2012 وتسمعات هضرة على أنه لاعب غير انضباطي، تواصلات هاد المشاكل مع فرقتو فالنرويج حيت خرج من التداريب حيت معطاوهش يتيري كوفرا، وكملها فالريان القطري ملي خرج من الملعب غاضب بوحدو، ونزيدو أنه مجاش بعد الإستدعاء اللول ديال رونار لأنه فضل يبقى مع فرقتو فالسعودية.

هادو سوابق يمكن نبنيو عليها باش نفهمو عقلية لاعبنا المغربي ومنستغربوش ايلا كان القرار ديالو يخلي المنتخب نابع من رفض فجر يعطيه بينالتي، وكان واضح الإنزعاج ديالو وصغر التفكير ديالو بشكل كبير…كيف يعقل أنك لاعب محترف وتقلق من بينالتي مغاديش ضربو فماتش ودي؟ واش الدافع الأساسي هو تبين راسك وبلاصتك فالمقابلات الحاسمة ولا نبقاو نجريو ورا الأمور الصغيرة؟ وواش اللاعب المحترف من حقو يناقش قرارات المدرب اللي كيعين شكون يضرب ضربات الجزاء قبل المقابلة؟ كيبقاو الأمور ديال الإنضباط واضحة فهاد الشأن وميمكنش نلقاو عذر لحمد الله فقط لأنه ماركا بزاف هاد العام، وحمد الله جزء من مجموعة د اللاعبين اللي أغلبيتهم تألقات هاد الموسم وعليه فخاصو يكون منساجم معاهم ماشي منعزل وعندو تضخم فالأنا كبير.

أغلب الفرق اللي نجحات فالكورة نجحات حيت لومبيونص كانت واعرة بزاف ومنسجمة بيناتها، اللاعبين صحاب بحال هولندا 74 ولا مفاهمين سياسيا بحال البرازيل 82 ولا منضبطين وحالفين يجيبو الكأس بعد سنوات ديال العذاب بحال ألمانيا 90، تا فالمغرب بحال منتخب 86 و 2004 والراجا ديال 1999 و الوداد ف 92، كلها أمثلة كتقول أن الأجواء الصحية ديال المعسكرات أهم من الخطط التكتيكية أحيانا.

ايلا كان حمد الله منعزل وماباغيش يندمج فهو ميمكن يلوم إيلا راسو ماشي أي واحد، ثم علاش معمرنا سمعنا شي لعاب من البطولة تشكا من ثنائية لاعبي الخارج والداخل من غير فهاد المسألة هادي؟ ولو نفرضو كاين تكتلات، راه أمر عادي فأي معسكر مختلط ومجايش من دوري واحد، وأي منتخب فالعالم غادي تطل عليه غادي تلقى أنه عبارة عن مجموعات مصغرة، الإنسان ميمكنش يكون صديق كولشي وعدو كولشي.

أكبر إهانة للاعبين خلاو فرص ذهبية باش يلعبو فأوروبا وجاو للمغرب هي أننا نقسموهوم ونديروهوم فخندق مغاير على الللاعبين ديال البطولة، زياش وحكيمي مجاوش من فرق عريقة باش يسمعو هاد الهضرة، جاو باش يدافعو على الدرابو وكانو إضافة حقيقية واخا كانت بلاصتهوم محسومة فمنتخبات بحال إسبانيا وهولندا.

طبعا تصرفات بعض لاعبي المهجر فيها بزاف ديال الغرور والإندفاع والتسلط، ولكن هل لاعبي البطولة ملائكة؟ اللي كيضلو يشعلوها بيناتهم غير فاسنتغرام وفايسبوك، تا واحد مكامل هادشي علاش المدرب هو الوحيد اللي كيضبط الأجواء، وكنضن أن رونار نجح فهاد المهمة بشكل كبير من نهار جا.

بقات واحد المسألة مهمة، بمجرد ما حمد الله تعلن أنه غيمشي من المعسكر، النصر السعودي خرج فتويتر كيقول أن حمد الله غادي يلعب معاه فدوري أبطال أسيا مباشرة…بزاف على الصدف وبزاف على الحظ.

الس عبد الرزاق، الكرة كيلعبوها 11 لعاب، 11 عقلية، الإحتراف داخل فيه أيضا سعة الخاطر والتواضع، ولأجل ذلك طريق السلامة.
وغادي نلعبو مزيان فهاد لاكوب بلا بيك كون هاني.