كود الداخلة ///

كوارث كرانس مونتانا مستمرة تنظيميا. الحدث مهم للبلاد ولكن كيستغلوه وكيلعبو على هاد الاهمية باش يديرو ما بغاو. ليلى اوعشي بنت الكوميسير اللي حصلات على صفقات من هاد الحادث وحدة منهم.

حشومة هادي تبقى تاخد مارشيات وما ديرش الخدمة. مسؤولين ومسؤولات فوزارات طاحو بالعيا وكيديرو كلشي وهي كتبندر. والي الداخلة كيحميها بحال ايلى جاتو شي توصية من شي حد. كلشي اوهام وكذوب.

كيفاش حدث باش يدافع فيه المغرب على وحدتو الترابية يولي بگرة يحلبو منو بحال اوعشي للي ما عمرها تقدر تدافع على الصحرا حقاش عندها ماليها.

اللي كيضر ناس الصحرا بزاف هو امثالها. هو تهميش اولاد المنطقة ويجيبو ليهم امثالها “حنا هنا عايشين وضع خطير. دابا صوا الانفصاليين مسموع. صوتها ما نقدروش حتى نسمعوه. مخنوقين بسباب سياسة الدولة. بسباب دعمها لوحدين ماشي من الصحرا. هاد الشي اللي كيقلبو عليه الانفصاليون” يشرح منتخب معروف من الداخلة ل”كود”.

كيفاش وحدة بحال اوعشي جات وبدات كتبني فاوطيلات وكتسكن فيهم الصحافيين اللي جايين من برا باش تبان وهي ما كيدير والو.

الوالي مسؤول على هاد لفضايح. مسؤول على الاقصاء الممنهج لاولاد المنطقة. مسؤول على تهميش الطاقات المحلية. ما تجيبوش لي شي حد من طانطان ولا كازا. خاص اولاد الداخلة اللي يستافدو. سيرو عندها للوطيلات ديالها وشوفو شكون مخدمين. فضيحة وصافي.