24/04/2024 16:48
أخنوش كلاشا تجربة بنكيران بلا مايذكر سميتو: مكونات التحالف الحكومي نجحات في تجنب الصراعات الفارغة وعدم هدر زمن المغاربة
سهام البارودي – كود//
ماكاينة تا علاقة بين اللباس و التحرش
ماكاينة تا علاقة بين اللباس و التحرش
ماكاينة تا علاقة بين اللباس و التحرش
هاد الجملة خاص بزاف ديال المغاربة يكتبوها ميات مرة على الله تدخل ليهم الفكرة لراسهم ! حيت التحرش الجسدي لي كايتعرضو ليه العيالات فالزنقة خطير و مقود و لكن لي أقود منو هوا التبريرات لي كايعطيوها شي كمامر الغضب لهاد القضية ! و خصوصا فاش كايردو اللومة للضحية لي لابسة ” قصير”
فالثمانينات و التسعينات فاش كان بوزبال فالمغرب كايخاف و مكمش و قبل انفجار الهجرة القروية و التبعات ديالها كانو العيالات كايلبسو الصايات و الكساوي و السالوبيطات ! انا شخصيا كانعقل على استاذات بالصايات فوق الركبة كانو كايقريونا ! كان الاحترام و حتى شي هايش مايشي ماكان يجرأ انه يقيس شي مرا !
دابا ف 2021 ! ضحايا الهجرة القروية و سكان القوادس كثرو و هجموا و كايفرضو السيطرة ديالهم على بزاف ديال الاحياء درجة انه المرأة ماعندهاش وجود فالفضاء العام تما ! فشي احياء هامشيين فكازا و لا الرباط راه مستحيل المرا تتسارى بكسوة و لا صاية حيت يقدرو يحيدوها ليها ! يخوروها ! يغتاصبوها ! كلشي وارد مع هايشر !
و لي ماعارفينوش هادو لي كايربطو التحرش باللبس و كايحاولو يلقاو السبة لتبرير جريمة كبيرة هو انه حتى فالحج ياك الحج لي بنادم كايمشي ليه باش يتكونيكطا مع الله و يتخشع و كايكونو العيالات لابسين الاحرام و مستورات و لا عطر لا ماكياج لا شعر مطلوق و كايتعرضو للتحرش! ايه نعام آ سي فالحج العيالات كايتقرصو من تراميهم و يبوانتيو عليهم و يعبزو ليهم بزازلهم ! ايوا ؟! شنو كايبرر دابا التحرش فهاد اللحظة ؟
التحرش مسألة تربية ! بنادم مامربينوش واليديه على احترام جسد الآخر ! على احترام المرأة ! على أنها ماشي ضعيفة و ماشي جسدها مستباح و ماشي قحبة ديالو و ماشي اقل منو باش يحگر عليها و يتحرش بيها !
هادشي علاش خاص فعلا تفعيل قانون التحرش و ماخاصش التساهل ! حيت اليوم فالمغرب الاغلبية ديال البنات لاسولتيهم غاتلقا فايت شي واحد تعدى عليها جسديا ! شد فيها بزز ! خورها ! بوانتا عليها ! قاس ليها صدرها … !
العيالات كايحسو براسهم بيناليزي حيت عيالات ! كايتعاقبو حيت عندهم بزازل و سوة و مفروض عليهم يغطيوهم و يخبيوهم وسط الدرابل باش يعيشو فالتيقار !
كاينين بزاف ديال البنات كايهاجرو من المغرب لدول أخرى فاوروبا ! دبي !السينيغال ايه نعام آسي السينيغال غي باش يعيشو بحرية و يلبسو كيف بغاو و يخرجو يجريو فالبحر الصباح و يلبسو كسيواتهم و صاياتهم بلا مايصرفق ليهم شي حد ولد القحبة ترمتهم و يتعدى عليهم.
