كود – تقارير //

كشف الكوميدي المغربي اليهودي كَاد المالح، على سر من أسرار العائلة ديالو اللي يالاه عرفو مؤخرا، وخلاه مشوكي نوعا ما، اللي تكلم عليه فمقابلة مع المجلة النسائية الفرنسية ماري كلير.

هذ السر كيقول المالح أنه اكتشفو عن طريق ختو جوديث المالح، واللي احتفظات بيه لسنوات طويلة، كيتعلق بجدو جودا المالح، اللي كان عندو حانوت ديال الدروكَري، وكان كَاد المالح فاش كان صغير كيرجع للمدرسة وكيمشي عندو.

كَاد المالح كانت عزيزة عليه جداتو بزاف، ومازال لحد الآن فاش كيتفكرها كيهبطو ليه الدموع، ومؤخرا، وعن طريق ختو، اكتشف أن جدو ماكانتش عندو مرا وحدة، بل كانو عندو جوج، جداتو ووحدة خرى اللي كانو كيقولوليه من صغرو بأنها مت جداتو، فيحين لا كانت مرات جدو اللولى، وكان تزوج عليها جدو حيت عاكَرة، وتزوج جداتو بزز منها، واللي كانت داك الساعة مازالة مراهقة.

وكان احتفل المالح فوق الخشبة بمرور 100 عام على ميلاد الجدة ديالو، اللي كان سميتها “سمحا”، اللي كتعني الفرحة بالعبرية، وأكد أنها كانت مفرحاه، كيف هو فرحان وفخور انه كان قدر يضحكها فاش كان صغير.