وكالات //

كلب توضر على العائلة اللي مربياه ملي كانو راجعين فالطريق من بعد عطلة في الطليان، ومن بعد قدر يكمل طريقو بوحدو حتى باش يرجع عند مواليه.
‏
قصة الكلب “پابلو” (Pablo) من لاراس “تريي” (Jagdterrier/Terrier) شدات انتباه العالم كلو، بعدما نجح يضرب 380 كيلومتر باش يرجع للدار.

الكلب عندو عامين خرج من الكاراڤان ديال مواليه فاش وقفو يستارحو فجهة “La Savoie” جنوب شرق فرنسا، ومشا يتحرك و يلعب برا  لكنه مارجعش.. والعائلة تسناتو ومن بعد شدات الطريق باش تدخل فحالها إلى منطقة “Bezouce”في الجنوب.

العائلة قبل ما يكماو طريقهم علمو العمدة ديال “Saint-Martin-de-Belleville” باللي وقع.

الكوبل “كاترين” و “روجي” كانت فرحتهم كبيرة فاش صيفطات ليهم صاحبتهم، اللي كانت مقابلة ليهم الدار فاش كانو غايبين، تصويرة ديال “پابلو” وهو فالدار. و من بعد قررو يعلقو ليه جهاز “GPS” باش مايتعاودش نفس المشكل مرة أخرى.