عفراء علوي محمدي- كود//

بعد اتهامات طالتو بالسرقة الأدبية، صرح كَاد المالح، الكوميدي اليهودي المغربي، أن بزاف ديال صحابو، من الفنانين، والكوميديين، خدلوه وقلبو عليه، فاش الأمور تصلحات رجعو ليه تاني.

هذشي قالو المالح، فلقاء ليه مع إيريك دوسار، فقناة RTL France، ووضح: “كنعرف ناس عطاوني بالظهر، ولكن كنعرف اللي كفس منهم، اللي عطاوني بالظهر إيه لكن فاش كلشي تقاد دارو دورة د360 درجة ورجعو، هذ النوع خايببن من لداخل”.

وفالفترة فاش كان المالح غارق اتهامات، هذ الناس، اللي منهم كوميديين مشهورين استغلو الفرصة وعايروه فبرامج تلفزية على الملأ، واخا كان كيحترمهم ويعاونهم، وفاش كيحتاجوه كيكون حاضر، وكيسلفهم الفلوس، وكانو كيرغبوه باش يحضر لبرامجهم.

وقال أن بعض هذ الناس، فاش شافو أن المالح باع تذاكر بزاف فالعروض ديالو الجاية، هضرو معاه بلا حشمة بلا حيا، وطلبو منو يلعبو فالجزء اللول دالعرض.

وصرح المالح أن صدمة هذ الكوميديين كانت كبيرة فاش مور هذشي كلو ضحك ليهم فوجههم وفتح ليهم قلبو وذراعو بحال إلى حتى حاجة ما كانت، ونهارو وحسو براسهم غلطو، وولاو مالآليز، “ولكن كيف قال تيري ليرميت: أنا كنسامح لكن عندي لاليست”.

Ces animateurs télé et humoristes qui ont lâché Gad Elmaleh après les accusations de plagiat. @OnRefaitLaTele sur @RTLFrance Tout sur l'émission ➡️ https://t.co/wOlh4fKxdA pic.twitter.com/8W7vwQnpox

— Eric Dussart (@E_Dussart) April 10, 2021