كود الصويرة//

اختتام قمة المؤثرين عالميا بالصويرة ليلة البارحة، في دورتها الثالثة، ولي دامت يومين عوض أربع لي ديرين فالإعلان ديال هذ القمة، لي جمعو فيها الناس لي عندهم متابعين كثار في مواقع التواصل مغاربة وربعة أجانب باش يعطيو صيغة العالمية .

هذ المؤثرين لي جابو من عالم الموضة والرياضة والمكياج وحجابي عفتي وأنا وزوجي، باش يدورو بهم الحركة ويسوقهم على اساس هم قادة الرأي في العالم الرقمي، جلهم عندهم متابعين في الأنستغرام، لأن الفيسبوك واليوتيوب الى مكانش عندك المحتوى جيد وخاتر، مغاديش دير بلاصتك فيه، عكس الأنستغرام لي كيركز على الزواق.

هاذ اليومين  بدات بشوهة حفل تكريم لي مجاوش ليه جل المكرمين، واليوم الثاني بدلو فيه مكان الندوة فجأة من أوطيل لدار الصوري بالمدينة.

هاذ النشاط لي سماوه قمة، قالو غادي يناقشو فيه أحدث المتغيرات في العالم الرقمي من خلال ندوات وورشات عمل، والشوهة أن هاذ المؤثرين مقدوش يأثرو حتى فلي معهم لدرجة مكينش لي كيسمع للورشات، شي كيهضر وشي كيتصور، وشي مشا يتسارا فالصويرة وخلا الكراسا خاويين.