كود كازا//

قربالة نايضة فالطائفة اليهودية فكازا، بسباب مكالمة تسربات، دارت بين الراهب يوشيياهو بينتو وواحد المافيوزي سميتو شالوم دومراني، مشدود فالحبس فإسرائيل.

فالمكالمة بينتو كيحاول يقنع دومراني، اللي كيتعتبر من الريوس الكبار ديال المافيا الإسرائيلية، باش يجي للمغرب فاش يخرج من الحبس، ومدة العقوبة الحبسية ديالو قريب تسالي مع حلول أعياد بوريم، وبيساح.

الراهب بينتو، اللي كيعتبر راسو نوميني كأكبر راهب فالمغرب، واخا مغضوب عليه من طرف جميع الطوائف اليهودية فالمغرب، اقترح على المافيوزي يجي للبلاد، ويبدا حياة جديدة، ويستثمر ب20 فالمية من الأموال ديالو فمجال العقار، وحتى يدور الحركة عاد يرجع لإسرائيل.

هذ المكالمة دايرة حالة فالأوساط اليهودية، وحسب مصدر ل”كود”، فأعضاء كثار من الطائفة فكازا اعتبرو هذشي “خطير”، وتساءلو واش المغرب غيولي “مرتع لعناصر المافيا الإسرائيلية” اللي كتنشط فهذشي ديال “الاتجار فالمخدرات” و”تبييض الأموال”.

وكيف كيقول مصدر “كود”، كلشي الطوائف فالمغرب، وخصوصا دكازا، بغاو يسيفطو بينتو يرجع بحالو، بحكم أنه يالاه جا للمغرب ف2019، وبدا يدير الجدور والحلفاء اليهود من برا، كيف عندو نوايا انقلابية على سيرج بيرديكَو، رئيس الطوائف اليهودية، اللي حتى هو غضبان عليه وماعاجبوش الحال، من بعد تسريب هذ المكالمة اللي هضر فيها بينتو مع دومراني من وسط الحبس.

وبينتو باغي ينقلب حتى على روح اليهودية التقليدية المغربية، وهذي شهورا باش دار مدرسة وجمع فيها ليزورطودوكس، باش يقعد لليهودية الأورطودوكسية اللي كيعتبروها اعضاء الطوائف اليهودية فالمغرب دخيلة على البلاد، كيقول نفس المصدر.