كود هناء ابو علي ///

نهار لثلاث 09 نونبر 2021 خرجات الحكومة بيان فيه باللي من 10 شتنبر ترفع حظر التنقل الليلي فالبلاد وباللي “تبعا لتوصيات اللجنة العلمية والتقنية، وتثمينا للنتائج الإيجابية التي تحققها “الحملة الوطنية للتلقيح” وانعكاسات ذلك على تحسن الوضعية الوبائية بالمملكة، واستنادا للمقتضيات القانونية المتعلقة بتدبير حالة الطوارئ الصحية” وباللي كلشي يتفتح الا الفضاءات اللي فيها تجمعات كبرى. هدرو على فتح المؤسسات السياسية والتجارية والمقاهي والمطاعم وقاعات الرياضة والحمامات، إلى غير ذلك من المرافق العمومية”

حسب تصريحات مسؤولين ل”كود” فكلشي يتفتح الا التيرانات وكلشي يتنظم الا المهرجانات لكبيرة. فليلة لاربعا كلشي دار. كنهدرو على السلطات المحلية. شي كيقولو ليه سد مع لحداش كيف كان فالسابق وشي كيقولو ليه حتى الوحدة. شي عطاوه كثر. 
بعدها جات مراسلة من وزير الداخلية للعمال والولاة خربقات كلشي. استثنات الكابرايات وكاع بلايص النشاط. يعني بحالهم بحال التيرانات يبقاو مسدودين.

هاد القرار واخا ضد قرار الحكومة وضد توصيات اللجنة العلمية ولكن شي وحدين قبلوه. غير هما غاديين يتصدمو. فمدينة وحدة شي مسموح ليه الشطيح والرقص والموسيقى والبركة فالكونطوار وشي ممنوع. كيف شفنا مع مطاعم بحال لوبيري فعين الدياب ديال مجموعة بالموري العقارية ومولاتها لالاهم مرجانة. 

الليل فكازا مات. تقتل. كلشي ولى عبثي. فالرباط كيفاش عاينات “كود” كاين حياة اخرى. فاتحين الريسطورات وفاتحين الكاباريات. فحسان كاينين وكيبقاو حتى الجوج الليل. موسيقى لايڤ ومغنيين رجعو لخدمتهم بعد تشوميرة طويلة. ايلى بغيتي الطرب موجود ايلى بغيتي الشعبي كاين ايلى بغيتي الاجنبي من خليجي ومصري وغربي حتى هو كاين.  ايلى شدك الحال يمكن ليك تشطح. ايلى عييتي تقدر تشرب كاس فالكونطوار. تقريبا تقريبا الحياة رجعات كيف كانت وصافي.

فمراكش الامور كيف نقلات شهادات حتى هي بحال الرباط. هادي الرباط اللي معروف عليها مدينة الخدمة ولات ناشطة فالمقابل كاين والي فكازا كيكره الحياة ترجع لمدينتو. عندو قرارات غبية قاتلة ليل كازا. النتيجة فنهاية الاسبوع كتقلى لوطوروت عامرة لمراكش وفليام العادية شي وحدين كيمشيو للرباط يفوجو. 

كازا مدينة خايبة بلا ليلها او لياليها. بلا كابارياتها اللي متنوعة. كلها وميزانيتو. حتى بيرانها الزوينين والموسخين مازال مسدوين لحد الان. شي بيضاوة طالع ليهم الدم ما فاهيمنش فظل وضعية وبائية مخيرة بزاف وفظل تلقيح غادي حتى هو مزيان وباقيين محاصرين كازا باي نايت. ماشي محاصرينها. مانعينها كاع. 

احد هاد الكازاويين قال ل”كود” “ياكما كيوجدو فهاد المدينة للخوانجية يحكموها. راه هاد الشي ما مفهومش”. 

عندو الحق. عين الدياب قلب كازا باي نايت كيموت ومدن اخرى مفتوحة ورجعات نشاطها وقصايرها.