سامي العلوي- گود كازا //
الناس ديال الاستقلال واحد الفئة منهم دايرا حملة ديال التضامن مع الامين العام والوزير نزار بركة ويطالبو فيها بالتحرير ديالو بحالا السيد راه أسير حرب، وهاد الشي كامل باش يفكوه من هاد الشي لي كيوقع ليه من بعد ما حنا الراس واستسلم لگاع التعديلات لي باغي يفرضها واحد التيار كاين في الحزب كيقودو حمدي ولد الرشيد.
وحسب مصدر “گود” من داخل الحزب، فكاين استقلاليين لي باغين الأمانة العامة تنتاقل بالوراثة وأن نزار بركة غادي يفرط في العقد اللي كيضمن ليه هاد الاستمرارية لي ورثها على جدو علال الفاسي وانتاقلات لنسيبو عباس الفاسي قبلما يطيرها ليهم حميد شباط في واحد الفترة من الفترات لي حرم منها خالو عبد الواحد الفاسي في مؤتمر الطباسل الشهير، ولكن منين رجعات لنسل علال الفاسي عن طريق نزار فراه عجز على احاطة الأمانة العامة بالوقار.
وحسب مصدرنا كيف ديما، فراه نزار بركة بدا كيسمح في اختصاصاتو في الحزب وهاد الشي بان في قبول التعديلات لي غادا تبعد گاع بي كيتسلل لاجهزة الحزب وهما بزاف بالصفة ماشي بالانتخاب وهاد الشي كيصعب المأمورية ديال الاستبعاد الا بهاد الحل السحري لس دارتو اللجنة التنفيذية في الخلوة ديال الهرهورة ولي حضر فيها نزار وباركها بنفسو.
وعلى حد ما كشف مصدر “گود” فراه هاد الحملة ديال التضامن الداخلي كتبين ان كاين ناس مبقاوش حاملين نزار بركة وولا مرضهم بالسلبية ديالو في الحزب ومع المناضلين ديالو، واكثر من هاد الشي كيقول مصدر “گود” ان الناس لي حماوه من الطباسل ملقاوش بلايصهم في الحكومة.
هاد الشي كامل كيفسر ان الحزب غادي يعيش احداث سخونة وانا نزار الكيوت لي صوتو مكيتسمعش كيعيش ايامو الاخيرة قبل المؤتمر .
