سهام البارودي – كود//

” غلطة كبيرة هادي درتو حيت ماحتارمتوش التقاليد و الاعراف ديال البلاد لي نتوما فيها”
“شنو كايصحاب ليكم راسكم حاطين لينا هادشي هنا ! خاصكم تحتارمونا ”
“هادشي سميتو التبرهيش ! راكم درتو غلطة ديبلوماسية فاش حطيتو هاد التصويرة”

هادو نماذج ديال التعليقات لي كتبوها ماليها بالانجليزية فالصفحة ديال السفارة البريطانية فالمغرب مورا مابدلات تصويرتها و زادت فيها الالوان ديال علم المثلية و لي كاتشم فيهم ريحة التناقض و التخلف كاتعطعط!

شهر جوان هوا شهر “الفخر” عند المثليين ! الشهر لي كايدارو فيه احتفالات و مهرجانات فالعالم كامل باش يحتافلو بالتطور لي عرفاتو القضية ديالهم و الحقوق لي قدرو ينتازعوها مع الوقت ! و بمناسبة هاد الشهر ! بزاف ديال الشركات العالمية كاتبدل التصاور ديالها و تاتزيد عليهم الوان الطيف لي كايمثلو المثليين فالعالم !

و ماشي غير السفارة ديال بريطانيا ! معظم الماركات العالمية لينكدين، يوتوب، اوبير، فايسبوك، اير بي ان بي…. كنوع من اعلان التضامن ديالهم مع حركة المثليين عبر العالم و أنهم هوما براسهم كايحتارمو الاختلاف ! و كايحميو الناس لي خدامين معاهم من اي نوع من التمييز على اساس الاختيار الجنسي …

وا دابا شوف العالم فين غادي ! اباطرة العالم فين غادين ! و بوعو ديالنا مديرونجيه انه السفارة البريطانية تبدل الفوطو دبروفيل ديالها كنوع من التضامن ! قاليك آ سيدي ” ماااحطارمطوناش!” تااا شغايحتارمو فيك ؟ التخلف ديالك و الجهل و الحجر على حقوق الغير ؟! شنو غايحطارمو فدينمك آ الخرزي ؟ الرغبة ديالك فالسيطرة على ترامي عباد الله ؟! عدم القدرة ديالك على الدخول سوق فرك ؟ شنو بغيتي يحطارمو فيك قولينا؟

و الاهم من هادشي كلو !آش هاد التناقص؟ نفس داك بوعو لي كايغوت فالفايسبوك غاتلقاه ماكرهش شي فيزا سياحية لبريطانيا واخا غا يتصور حدا ديك الرويضة الكبيرة و يبوسطيها فالفايسبوك و طبعا اغلبهم لا قلنا ليهم راه بريطانيا غدا غاتفتح مسابقة للحصول على اقامة دائمة و لا الجنسية البريطانية و من شروطها انك تكون كاتآمن بالاختلاف و كاتحتارم المثليين غايوليو الطوب د التسامح و التفتح الفني و يقدر يديكلاري راسو مثلي گاع باش يعلق من هنا و شحال من واحد دارها و مشا كايطلب اللجوء الانساني …

بنادم كايقوليك ” اللهم اخرجنا من هذه القرية الظالم اهلها ” وا راه نتا هوا داك ” الظالم اهلها” لي كادوي عليه ! كيفاش نتا رافض انه المثليين يتعطاو ليهم حقوقهم هنا و فنفس الوقت باغي تمشي تعيش فالبلدان لي عاطياهم الحقوق لهيه ! لاش باغي تمشي لدوك البلدان لي كايحتارمو المثليين ملي نتا ماقادش تحتارمهم و تعيش معاهم و تشوفهم بنادم فحالك فحالهم فبلادك ؟! ماعارفش بلي لامشيتي تما راه جارك يقدر يكون مثلي ! الاستاذ ديال ولدك ! الباطرونة ديالك فالخدمة ! شنو غادير ديك الساعة ؟ غاتلبدها و غاتحني گمگومك كي الكلب و لا غاتنوض تجاهد فيهم و ترميهم من شاهق و لا شنو زعما ؟!

لا الانسان خاصو يكون واضح مع كرو و لي بغا سيدي علي يبغيه بقلالشو ! حقوق الانسان راه عندها مفهوم كوني آ الخرزي خلاوها الگور آبروندر او آ ليسي ! يا ايما غاتعيش فدولة الحقوق و الحريات يا ايما غاتعيش فدولة القمع و الظلم ! ماكايناش شي دولة سير موزير غانصنعوها ليك باش توالم داك الاسطورة لي عندك غي فمخك بوحدك ! لابغيتيها سير صنعها فالصالون ديال داركم بالمخاد!