عفراء علوب محمدي- كود//

قبل العرض ديالو فمهرجان كان بمسرح “لويس لوميير”، كشف المخرج نبيل عيوش على البوند دانونص ديال فيلمو الجديد “علي صوتك”.

وغيتعرض الفيلم لاول مرة بمهرجان كان، غدا الخميس 15 يوليوز، مع التسعود ديال الليل بالتوقيت المغربي، بحضور طاقم الفيلم ونجومو.

الفيلم كيعاود على “أنس”، وهو مغني راب سابق، خدم فمركز ثقافي فحي سيدي مومن فكازا، وبفضلو قدرو الشباب يتعلمو يفنون الشارع اللي لقاو فيها راحتهم، ويعبرو بيها على قضاياهم.

والفيلم من إخراج نبيل عيوش، وسيناريو عيوش كذلك بتعاون مع مريم نقاش نهيلة عارف، وعرف مشاركة شباب من المركز الثقافي “نجوم سيدي مومن”، اللي دارتو مؤسسة علي زوا في 2014.

الفيلم من إنتاح شركة Ali’N Production وLes Films du Nouveau Monde، بمشاركة Unité وAd Vitam.