عفراء علوي محمدي- كود//

البارح السيول والفيضانات فكازا، اللي تكونات بعد نص نهار ديال الشتا، تعدات متر ديال العلو فمجموعة من الأحياء والطرقات وفالأنفاق والمنعرجات، المواطنين لبارح فالعشية لقاو صعوبة كبيرة باش يوصلو لديورهم، سواء اللي موتوريزي أو الراجلين، ووقعات فوضى كبيرة رجعات نقاش تهالك وضعف البنية التحتية دكازا للواجهة، وخلات المتابعين يتساءلو: شكون المسؤول على هذ الكارثة؟

اجتماع لتحديد المسؤوليات

“كود” تواصلات مع عبد الصمد حيكر، نائب عمدة الدار البيضاء، على هذشي اللي وقع فالعاصمة الاقتصادية، وقال بأنه غيتم عقد اجتماع عاجل فهذ الموضوع مع مسؤولي شركة التدبير المفوض المكلفة بالتطهير السائل “ليديك”، نهار الجمعة الجاية، اللي غيديرو عرض غيقدمو فيه معطيات حول ما وقع، مع العلم أنهم “قامو بمجهوداتهم لبارح باش يحدو السيول والفيضانات اللي وقعات”، على حساب كلامو اللي بناه على أساس  البلاغ اللي صدراتو ليدك.

وزاد المسؤول فمجلس مدينة كازا أنه فالبداية “خاص نحمدو الله على هذ النعمة دالأمطار، خصوصا وأن المغرب كان كيتمناها قبل أيام باش ترفع من الاقتصاد والمردودية الفلاحية فالوسط القروي”، على حد قولو.

واكد أن الشتا سبق ليها طاحت قبل خلال هذه السنة، وماكانش هذ المشكل، لكن اللي خلا الفيضانات تكون هي انها تساقطات استثنائية لبارح، بحيث معطيات مديرية الأرصاد الجوية كشفات أن معدل التساقطات وصل ل34 ميليمتر، و54 فبعض المناطق، بينما فشهر يناير كامل العام اللي فات كان وصل المعدل ل60 ميليمتر، وهذشي علاش التساقطات اللي قبل من ديال لبارح ماترتباتش عليها هذ المشاكل، كيف قال.

وقال حيكر أن مجلس المدينة كيدير بحساب هذشي كل عام، بحيث ديما فشهر يوليوز كيبداو عدد من الاجتماعات مع المسؤولين ديال “ليديك”، للاستعداد لموسم التساقطات اللي كتحدد نوعية التدخلات اللي غتكون، بشكل استباقي، كيف أكد أن هذشي تدار هذ الموسم، وتدار التطهير ديال البالوعات والقوادس والقنوات، باش إلى جات التساقطات متيكونوش القوادس مسدودين، وهذشي علاش التساقطات اللي كانت قبل “ماحسيناش بيها”، كيف قال.

مشكل الفيضان تاريخي

أما بالنسبة للمشكل ديال هذ الاختناق اللي وقع، واخا شركة التدبير المفوض دارت خدمتها قبل، فكيقول حيكر أن هذشي كان كيهدد كازا تاريخيا، ومن ديما، وكان خاص تدخل قبل ب20 عام من دابا، وأن المجلس فاش جا ف2015 2016، كان مشروع حماية كازا من الفيضانات من الأوراش اللي سطرها فبرنامج العمل ديال الجماعة، وكشف حيكر أنه تحددات مشاريع وتجهيزات تنجز منها بزاف وكاين اللي قرب تسالي ومازال مستقبلا غتنجز مشاريع خرى إضافية.

وكشف أن أهم مشروع تنجز فهذ الصدد هو نفق وقناة المجمع الكبير الجنوبي، اللي تدار  ف2016، واللي هو عبارة عن قناة كبيرة ضخمة تدارت تحت البنايات، وغطات ما بين عزبان بمنطقة  ليساسفة حتى لسيدي عبد الرحمان، اضافة الى مشروع فالدخلة دكازا فلوطوروت على مستوى البرنوصي مثلا كانت كتطيح شوية ديال الشتا وكيتشكلو فيضانات، و”دابا لقينا ليه الحل وحيدنا هذ المشكل، واخا هذا تجهيز مؤقت فانتظار تدار منشأة ضخمة من بعد فمنطقة سيدي مومن، إلى خدينا بعين الاعتبار تساقطات أكبر غتكون منبعد”، على حساب هضرتو.

مشاريع لتوقيف الفيضانات

وزاد حيكر أن جوج بروجيات غيكونو واجدين مع نهاية 2021، اللول فمدخل الدار البيضا ليساسفة بين لاروكاد لي كاتدي لطريق أزمور حتى لمدار عزبان،  باش يتحل المشكل فليساسفة 1 وما جاورعا، والثاني فالمنطقة ديال مولاي رشيد، اللي معروف أن واحد الزنقة فيه إلى طاحت الشتا لمدة 5 دقايق كتغرق، وأكد أن الأشغال متواصلة منذ شهور باش تدار حلول جدرية لهذشي، كيف “درنا تجهيزات ضخمة وتجهيزات إضافية، وكاينة نقاط أخرى بحال عين الشق تاهي فطور الدراسة”.

وقال أنه هاد الشي لي تدار هاد خمس سنين الأخيرة مع هاد المجلس ماتدارش عشرين عام هادي.