كود الرباط ///

فضيحة كبيرة وشوهة ما فايتاها شوهة دارها برلماني البام فعين الشق عبد الحق شفيق البارح فالبرلمان اثناء مناقشة ميزانية وزارة الداخلية بحضور الوزير عبد الوافي لفتيت. هاد الشوهة نقلها الصحافي عبد الله الكوزي على صفحته على الفايسبوك. الصحافي في يومية “الصباح” قال انه وطيلة عشرين عام ديال تغطية البرلمان ما عمرو شاف برلماني كيبكي. هاد السيد ما كيبكيش على مصالح المواطنين. اللا. على مصالحو لكثيرة. السيد عندو شهرة كبيرة بزاف بزاف فكازا. مشوه ماشي شهرة زوينة.

البرلماني عن حزب الاصالة والمعاصرة كان كيبكي وكيهدر على تزوير ملكية الأراضي المسترجعة، و أراضي الأحباس في منطقة اولاد حدو بضواحي الدار البيضاء. اي الدائرة ديالو.

وزير الداخلية لفتيت قال ليك قدام كلشي واجي عندي للمكتب وحكي لي اش واقع.

شفيق اللي ما كيحشمش كان بان فشي فيديو كيهدر على الاستيلاء من قبل شي وحدين على اراضي الاحباس وقال باللي كيفضح لوبيات العقار. اييه هو هو قالها.

لفضيحة لخرى هو ان هاد شفيق ما عندو علاقة بلجنة الداخلية والبنيات الأساسية. ماشي عضو فيها. السيد وفق مصدر “كود” تبادل غير البارح مع صاحبو من نفس الحزب المعلوم هشام لمهاجري من شيشاوة باش يجي كدام وزيري الداخلية لفتيت وبوطيب ويدير راسو تيبكي.