هناء ابو علي – كود كازا ////

هادي يومين تلاقى شي تجمع طلق على راسو “نقذو كازا” ولكن بالانجليزية ماشي بالدارجة٬ مع عمدة الدار البيضاء نبيلة الرميلي. هاد اللقاء فضيحة كبيرة. علاش؟ لانو احد وجوهو كاتبة مناهضة للتلقيح. هادي من داك النوع اللي قال عليهم الرئيس الفرنسي غادي ناوميرديهم. دابا هما اللي كياوميرديونا وصافي.

الكاتبة اسمها منى هاشم. دخلات لمكتب العمدة وتلاقاتها. السؤال. واش وراتهم الباس فاكسينال ولا اللا. واش شافوه ولا اللا.

هي واضحة. سبق ليها كتبات باللي ضد فرض جواز التلقيح. واضافت فتدوينة ليها ” كنعلن قدام الرأي العام الغاء كاع اللقاءات حول كتابي بالمحمدية والمعهد الثقافي الفرنسي بتطوان وطنجة واكادير.

ودخلات فتحدي باش قالت باللي غادية تبقى على موقفها طيلة هاد الجايحة.

الكاتبة كانت واضحة انها ضد الڤاكسان. كتبات باللي كترفض حقن جسدها بجسم غريب انو لا يوجد قانون يفرض عليها فعل ذلك.

وسالات ب »يمكن لي نخرج بلا ما نخرج. راني مولفة ». من غير انها دارت عكس كاع داك الشي اللي كتبات.

تلاقات مع شباب واقل من الشباب فانشطة فخرق واضح للقانون. ياك كاع لمغاربة سواسية. كيفاش تخرج وتدخل. تمشي للمطاعم وتكون فندوات وتلاقى العمدة كاع اللي كانت وزيرة صحة لايام واللي كانت المديرة الجهوية للصحة بالدار البيضاء. يعني كانت داخل معركة كورونا.

صاحبة شعار “لا للباس ڤاكسينال” بدون نقاش. من هادوك ديال نظرية المؤامرة كتدور وكتلاقى.

المشكلة هو فريق العمدة. باش يبغي يلاقيها مع شي حد خاصهم يعرفو شكون اولا. عندها فرقة خاصهم يسولو ويبحثو.

من حق هاد الكاتبة تكون ضد التلقيح ولكن ماشي من حقها تكون ضد القانون اللي فيه دابا الباس ڤاكسينال باش تدخل للمطاعم للمؤسسات العمومية.

واش بحال هاد العينة يمكن ينقدو “كازا” يمكن يكون عندهم شي تصور لهاد الشي. نخليكم انتوما تحكمو