السعودية طلبات كثر 33 ألف واحد يرجع طوموبيلاتهم “الهاي كلاس”.. مهددين بالكسايد ومشاهير ونجوم حتى هما معنيين
هناء ابو علي-كود//
بزاف من الصحف الامريكية كتبات اليوم و البارح على اعتقال السلطات لامراة امريكية من اصل فيلبيني و البحث مزال على خوها اللي هرب للفلبين و المثير ف هاد القضية ان السيدة اللي سميتها لويزا ستيرلا الجيعيدي كانت مزوجة من ديبلوماسي مغربي خدام فميريكان .
القضية معقدة بزاف حيث كانت على مدى عشر سنين و تستغلو فيها بزاف من العمال و العاملات ف نيويورك اللي دابا رافعين دعوات قضائية و كتنوب عليهم شركات محاماة كبيرة ،السيدة كانت كتستغل صفة راجلها باش تجيب عمال فيلبينيين على اساس انهم غادي يخدمو ف القنصلية المغربية ولكن كايلقاو راسهم عبيد ف المزرعة و لا خدامين ف الدار فظروف قاسية و بأجور منخفضة بزاف.. وبلا اوراق اقامة او باسبور حيث كاتحيد ليهم..
النائب العام عن ولاية نيويورك قال ان السيدة استغلت نظام الهجرة الامريكية و استغلت التسهيلات اللي كتعطى للقنصليات و السفارات الاجنية اللي منها الحصانة و تسهيل استقدام العمال الاجانب..
نفس الصحف الامريكية قالت ان السيدة مطلقة دابا من الديبلوماسي المغربي مند 2016 ولكن مصدر قال لكود تعليقا على هاد القضية الغريبة أنه ف النظام الخاص للديبوماسيين المغاربة باش يتزوج موظف ف الخارجية المغربية امراة اجنبية خصو ترخيص خاص من الوزارة بعدما كتدار اونكيت عليها..و ان اللي دار التاشير على عقود هاد العمال باش يكون متعاقدين او مايسمى اعوان محليين ف الخارجية المغربية تاهو يقدر يتجبد ف التحقيق حيث جرائم الاتجار ف البشر لا تسقط بالتقادم وخا تكون تدارت ف التسعينات من القرن الماضي.
نفس المصدر قال لكود ان هاد السيدة بالفعل كانت مزوجة بالسفير عبد السلام الجعيدي اللي كان ف البعثة الدائمة للمملكة لدى الامم المتحدة ف 2008 وكانو مستقرين ف برونكسفيل ثم ونشستر ف نيويورك.
الصحف الامريكية قالت ان الجيعيدي براسه ومعه المحاسب كانو كايوقعو عقود عمل د هاد العمال على اساس انهم غادي يخدمو ف القنصلية المغربية ف نيويورك باجور قانونية و بتأمين و تغطية صحية ولكن كايمشيو مباشرة للمزرعة باجر اقل من 500 دولار .. فعملية معقدة و محبوكة داخلين فيها اطرف كثيرة بغاو ينصبو على الامريكيين باستعمال نفوذهم و انتماءهم الديبلوماسي ..ولحد الساعة مزال ماتعرف واش السلطات الامريكية طلبات التحقيق مع هاد الديبلوماسي او تتحيد منو الحصانة.
وكتنضاف هاد الفضيحة لفضيحة سابقة وقعات ففرنسا ملي عاملة مغربية عتقوها الجيران من الاستغلال اللي وقع ليها ف منزل قنصلة مغربية بالاضافة الى الوضع المزري اللي كايعانيو منو الاعوان المحليين ف كافة السفارات و القنصليات المغربية ف العالم و اللي اغلبهم مغاربة، كما انها كتسلط الضوء على السلطات الكبيرة اللي كتشغلها زوجات السفراء و القناصلة بدون وجه حق ف التوظيف و استغلال النفوذ الشيء اللي كايأدي لمثل هاد الشوهات.