ميريكان غادي تعطي مكافأة ديال 10 مليار لأي واحد غادي يعطيها معلومات على المشة الكحلة
سهام البارودي – كود//
الناس كايزيدو القدام و كايشوفو المستقبل ! هادشي لي كايبان ليا فاش كانشوف الخارطة د اوروبا اليوم و كيفاش قدرو انهم يتجاوزو الحروب الطاحنة لي دازت بيناتهم و يطورو علاقات اقتصادية و سياسية مهمة تزيد بيهم و بشعوبهم القدام ! المانيا و فرانسا كمثال ! او فرانسا و النگليز ! و لا بعدنا اكثر غانلقاو الشينوا و الجابون … دول كثيرة كانت بيناتهم حروب طاحنة و ضحايا بالالاف و الملايين گاع و هاكاك قدرو انهم يتجاوزو الماضي و يبنيو الحاضر و يخلقو تكتلات باش يواجهو المستقبل !
العقلية الاسلاموية ! الخوانجية ! اللحاياوية لا ! مصرة اصرارا و ملحة الحاحا انها تعيش فالماضي و تبكي و تهرنن على زمن الخلفاء “الراشدين” لي الاغلبية فيهم ماتو مقتولين و لا مسمومين ! و تتحسر على الاندلس و تبكي على الاستعمار الفرنسي و الاسباني ! رافضين دينمهم يعيشو معانا فالفين و عشرين و نفكرو جميع للمستقبل و هادشي لاش خرج لينا مؤخرا الكتاني لي كان مشدود مورا احداث سطاش ماي باش يعيب على الزفرافي انه يسمي ولد خوه ” اكسيل” حيت الكتاني كايشوف انه ماشي من حق عائلة الزفرافي تسمي ولدها بسميت قائد امازيغي قتل “الصحابي عقبة بن نافع ” ! وا شوف دابا قمة مسالية الكر فين كاتوصل بنادم ! حنا نمحيو جزء مهم من الهوية ديالنا الامازيغية و مانسميوش ولادنا بسميات امازيغية حيت حقا و الواد سي الكتاني لي مازال عايش فالقرن جوج غادي يتقلق لينا !
هادي راه قمة مسالية الكر و قمة العنصرية اتجاه الهوية و الثقافة الامازيغية لي كايشوفها الكتاني لا ترقى لمستوى الهوية العربية الاسلامية لي باغينا نلبسوها بزز منا !
انا شخصيا كانشوف الكتاني و امثاله فحال داك البوليسي لي كان عافط على جورج فلويذ ! غي هوا الكتاني بغا يعفط على گاع الامازيغ و الهوية ديالهم بمكافحو و يخنقهم بالاقصاء و الظلامية لي عايش فيهم!