كود سبور//
عبر فيديريكو فالفيردي لاعب ريال مدريد الإسباني على الإعجاب ديالو بالاستقبال اللي تدار للفريق ملي وصل البارح للرباط باش يشارك فكأس العالم للأندية، وأكد أن تنظيم البطولة واعر.
وقال فالفيردي فالندوة الصحافية اللي كتسبق ماتش ريال مدريد والأهلي المصري: “الاستقبال اللي دارو لينا المغاربة كان واعر، وحتى التنظيم ديالهم لكأس العالم للأندية زوين بزاف وراه نجحو فيه”.
وكمل نجم ريال مدريد وقال: “عندنا جمهور هنا فالمغرب وغيشجعنا وهادشي غيخلينا نقدمو ماتش كبير ضد الأهلي ونتأهلو للفينال ونربحو الكاس”.
وغيلعب ريال مدريد الإسباني غدا الأربعاء مع الأهلي المصري فدومي فينال الموندياليتو، فتيران الأمير مولاي عبد الله بالرباط، ومن المنتظر يعرف الماتش حضور كبير ديال الجماهير.
