سامي العلوي -گود أگادير//

وقفات العناصر ديال البوليس ديال ولاية أمن اگادير لبارح خمسة ديال الطالبات كيقراو في جامعة ابن زهر بسبب السرقة.

مصدر “گود” كيقول على انه هاد الخمسة ديال الطالبات وقفوهم بسبب تهمة ديال السرقة ومقرونة حتى ب”الفساد”!

هاد الشي وقع في السد القضائي بالمدخل الشمالي للمدينة مني كانو راجعات في طوموبيلة من مدينة تاغازوت اللي كانو فيها في برطمة هما وزماگرية جاو يدوزو العطلة في تاغازوت.

وكشفات مصادر “گود” انهم من بعدما عاشو الحب ومارسو الجنس، شفرو الطالبات حويجات غاليين ديال هاد الزماگرية وهربو لاكادير.

وبالعودة للتفاصيل ديال هاد القصة، هاد الطالبات راقبو الزماگرية وهما كيحطو الفلوس وتويشيات ديالهم..

مني وقعات الشفرة مشاو الزماگرية لعند الجدارمية وعلموهم، ومن بعد الجوندارم خبرو البوليس اللي اعتاقلو الطالبات وداروهم تحت تدابير الحراسة النظرية .

الطالبات سرقو وهادي جريمة طبعا، ولكن الفساد علاش؟ ناس راشدين وباغيين تجمعو ومارسو الجنس، هداك سوقهم وحقهم.