20/04/2024 07:00
“تيك توك لايت” منوض روينا.. المفوضية الأوروبية عطات للشركة 24 ساعة باش تعطيها توضيحات
سهام البارودي – كود//
ديك النهار كانقرا مجلة جون افريك وانا نلقاهم ناشرين خبر على اللاعب دروگبا لي كاينظم واحد الگالا (سهرة) خيرية باش يجمع فلوس لتحسين الظروف الصحية و التعليمية بمجموعة من الدول الافريقية و اولها بلادو الكوت ديفوار ! هادي طبعا ماشي اول مرة كانسمع على الاعمال الخيرية ديال دروگبا لي من شحال هادي و هوا خدام فهادشي و نجح انه يجمع الفلوس و يبني مستشفى كبير فبلادو ف 2017 و بنا مدرسة و دار بزاف ديال الاعمال خيرية اخرى… طبعا هوا ماكايديرش هادشي من جيبو ميا فلميا و لكن كايستاغل العلاقات لي عندو بمشاهير المال و الاعمال فاوروبا باش يجمع فلوس يدير بيها هاد المشاريع …
دروگبا ماشي بوحدو فالقارة لي كايدير هادشي د المشاريع الخيرية الحقيقية، الكاميروني ايطو حتى هوا مثلا عندو فونداسيو … أما فأوروبا و ميريكان ثقافة الاعمال الخيرية المنظمة راها كاينة من زمان يا رحمن بحيث انه گاع ليسطار ديال الرياضة او الفن واخا ولاد بلادهم مامحتاجينش ليهم ، كاتلقاهم مكلفين بشي قضية و كايجمعو ليها الفلوس باش يعاونو عباد الله فالعالم كامل فحال مادونا ، ايلطون جون ، رونالدو ، شاكيرا، بيل گايتس و اللائحة طويلة… ها لي هاز الهم للتعليم ! ها لي كايجمع الفلوس لمرضى السرطان ، ها لي كايساهم فتمويل الابحاث العلمية لايجاد لقاحات ضد امراض فحال السيدا … مشاريع عملاقة ديال بصح حيد عليا من التخربيق الخاوي !
ولكن باش نقارنو بين جوج ثقافات متقاربة خلينا غير فدروگبا اللاعب الافريقي لي تاهوا خارج من بلاد مقودة عليها و مخربة بالحروب و النزاعات السياسية و لي تاهوا يمكن ليه يبقا يجمع فالفلوس و يبني الديور و يحل القهاوي و تاواحد ماغايدوي معاه ولكن واخا هاكاك كايدير عمل خيري منظم ، واجي نقارنوه بالرياضيين و الفنانة ديالنا لي عارفين البلاد كي دايرة و واخا هاكا ماعمرني سمعت على شي واحد فيهم دار شي فونداسيو و لا شي گالا خيري و حاول يستاغل معرفتو بالمشاهير و السياسيين و يحركهم باش يتخدمو على شي قضية فيها مصلحة للبلاد و للناس : و عطا الله القضايا ! ها التعليم فالعالم القروي، ها الصحة و المستشفيات لي مقودة عليها ، الفقر ، الميزيريا، بلاد كي راس القرع فينما ضربتيه يسيل دمو و الرياضيين ديالنا اغلبهم كايطيرو غا فالسعاية و جميع الگريمات و حلان القهاوي !
ايه التقدم ديال البلاد و حل المشاكل ماشي بالاعمال الخيرية غايكون و لكن مزيان تكون و تكون منظمة و تخدم قضايا مصيرية و مهمة لي تعود بالنفع، ماشي لي فاق عليه الضمير كاينوض يشري جوج حوالا فالعيد الكبير لشي اسرة مقودة عليها و يصحابليه الاعمال الخيرية هي تشري الحوالا و لا تبني جامع ! الاعمال الخيرية الحقيقية راه كاتكون منظمة و فيها مشاريع كايخدمو عليها عباد الله قارين و وواعين و التأثير ديالها على الامد البعيد اما الحولي راه كاياكلوه و يخراوه !
و تقدر ماتخسرش فيها فلوسك آ سيدي ! نتا خدم غي بلي كونطاكط لي عندك داخل و خارج المغرب و حركهم و سعاهم و ماكاينش لي غايرضك، منها الرياضي كايستافد حيت الصورة ديالو كاتحسن و كايبان انه عندو دماغ ماشي غا رجلين ! و منها كايدير شي حاجة لي تخليه يبقى فالتاريخ …
ولكن معامن كادوي ! معاااامن كادوي !
