سهام البارودي – كود//
عمركم شفتو شي حوار فحال هاكا !
س:فلان واش كاتاكل الليمون ؟
ج: انا التقاشر لاتقطعو ليا كانخيطهم ماكانلوحهمش
س: واش كاتفضل تسافر للشمال و لا للجنوب ؟
ج: الزيتون لاكان بلا عظم احسن
حوار احمق ياك ! ايوا راه هذا هوا الحوار لي دار المهداوي مع شباط ! المهداوي كايسول فالشرق و شباط كايجاوب فالغرب !وسط ميات سؤال ! شباط جاوب على زيرو سؤال ! لدرجة يقدر يسولو واش كاتشرب الما د القرعة و لا د الروبيني يجاوبو ! ” وا راه المونادا غالية آ صاحبي” ! شتي تهضر مع التوام مافيوزي التقدم و دي و تجيب معاهم فالهضرة بطريقة لوجيك و شباط لا ! شباط فحال داك التلميذ الكسول لي كايبغي يهرب من الاجوبة بأي طريقة !
و المشكلة انه الطريقة باش كايإيسكيڤي الأسئلك مفروشة ! ماكايجاوبش توسامبلومون ! و ممكن بطريقة بسيطة انك دعقو ! و لكن ماكايتدعقش ! كايبقا يخربق عليك و هوا مخرج فيك عينيه و تحشم نتا و مايحشمش هوا ! يسطيك ! يخرج ليك العقل! كاينة لغة الخشب و كاينة لغة شباط !
شباط ماعارفش اليمين من اليسار ! ماعارفش حزب ذو مرجعية اسلامية من حزب شيوعي ! ماعارفش الفرق بين العلمانية و الالحاد ! شباط ماقاريش ! شباط غا كايشير و غا كايخربق و غا كايتهرب ! ماباغي ياخد تا موقف لا من اعتقال الصحفيين لا من الحراك لا من الريع … ! و ماباغي يقول تاخرية ! و هاكاك غايخرج فيك عينيه و هاكاك ناجح سياسيا و هاكاك كان أمين عام حزب الاستقلال ايييه نعام ا سس و عمدة د فاس ايييه نعام اسسس! و مصور مع سيدنا نعام ا سس ! شباط واخا غبر ثلت سنين على البرلمان و كان كايتبرع مع راساتو بالخلصة ديال البرلمان فتركيا ماحشم ما رمش فاش گال للمهداوي “كنت كانستاراح” ! وا معاك جات الراحة آ سي شباط !
غي مسألة انه شباط بالنيڤو الهزيل ديالو انسان ناجح سياسيا فالمغرب كايدل على انه اي واحد ممكن يمارس السياسة و ينجح فيها !
