الكونغرس الأميركي دوز مساعدات بالملايير لأوكرانيا وإسرائيل وتايوان.. واجدة لتوقيع بايدن اليوم والصين ما عجبهاش الحال
محمد سقراط-كود///
دابا واحد مقاتل مع الوقت بصالير فايت السميك بنغيزة، شرا فياط أونو قديمة بشي جوج دالمليون أو تلاتة يبقى يهز فيها رجليه، الى شدو شي رادار حدا بلاكة الستين فايت السرعة القانونية غادي بسبعين مثلا غادي يخلص بروصي ديال 700 درهم لي تقدر تكون أكثر من 20 في المية من الصالير ديالو ومصروف سيمانة على الدار، وفي نفس الوقت واحد عندو فيراري ولا بورش ولا جي كلاس غادي يخلص حتى هو نفس الثمن لي مكيمثلش حتى جناح بعوضة من الثروة ديالو، فيناهي العدالة هنا، مول فيات أونو يقدر يردعو البروصي ويخليه يرد البال مرة خرى ومايعاودش حيت غادي يكون تضرب في جيبو بصح، بينما واحد مخنوق بالفلوس عندو آخر مكاين في الحديد كيشوف الرادار ومع ذلك كيكسيري وعندو هانية يحلص غرامة المهم هو يمشي بالسرعة لي باغي واش غادي تردعو مخالفة سير ديال جوج فرنك بالنسبة ليه.
كذلك الطريق السيار غير معقول واحد عندو بيجو 205 يخلص نفس الثمن ديال واحد عندو Q8و= الوزن ديالها فايت جوج طون، الأثار لي كتخلي على الطريق مع المدة والإنبعاثات بالإظافة ألى غبار المطاط الناتج على الإحتكاك ديال الروايض، كاين لا عدالة حقيقية وكاين ظلم موجه ضد بسطاء هاد البلد وطبقته الوسطى المقاتلة ليل ونهار مع المصاريف والكريديات، وفاش كيديرو شي طوموبيل صغيرة كيلقاو راسهم مظطرين في بعض القطاعات أنهم يصرفو بحالهم بحال ميليارديرات البلاد.
خاص الدولة تدير الغرامات على حساب ضريبة السيارة على الأقل، واحد عندو طوموبيل صغيرة إيصانص كيدور بيها وسط المدينة كيخلصث عليها 350 درهم ضريبة، خاص يوليو بروصيات خاصين على حساب فئة السيارة، راه مايمكنش تكون مخالفات السير فيها هاد التطرف في المساواة لي كيخدم صحاب الفلوس وكيضر بالطبقات الوسطى وماتحت، على الأقل يولي الواحد يخلص بروسي محدد بنسبة وفق ثمن الضريبة لي كيخلص، واخا حتى هي فيها جدال غادي تلقى كولف آخر مكاين كتخلص الضريبة قل من رونو 18 ديال القرن لي فات، راه معندو معنى هادشي واش غير لي عندو باش يخلص يبثى يخرق القانون كيف بغا، أما الموشكيل ديال الدراجات النارية الكبرى في لوطوروط ديال المغرب هاديك قصة خرى، موطور كيخلص بحالو بحال الطوموبيل واش هادو من نيتهم لاش بالسلامة.