كود كازا ///
هاد الشي غريب. كيبين اش كتمثل لبلاد عند الديبلوماسيين. عقلتو علي هاداك الملحق العسكري السابق لسفارة المغرب في واشنطن اللي حصل مع مراتو فشي قضية وتحاكم فامريكا. هاداك مع الاسرار اللي عندو علاش بقى الخارج وعلاش ما دخلش.
دابا البارح مات ديبلوماسي مغربي اسمو بوشعيب الخلفي ففرانسا. هادا كان قنصل فثلاثة المدن: فيلومومبل وبرشلونة وأورلي. لاماب نشرات خبر وفاتو وكتبات وكان الفقيد قد راكم تجربة طويلة كقنصل عام للمملكة …. بعد تقاعده، استقر الفقيد في فرنسا ،حيث يواصل أبناؤه دراستهم، و منذ ذلك الحين لم يتوانى عن وضع خبرته في خدمة الجمعيات المغربية في منطقة إيل دو فرانس”.
كيفاش بعد تقاعده مشى مع ولادو ففرانسا. يعني اي ديبلوماسي كان فشي بلاصة يقري ولادو اللي كيقراو من فلوس الدولة وهي اللي كتخلص عليه ويزيد يبقى فنفس البلاد ما يدخلش. واش هاد الشي عادي عندهم فالخارجية؟
باش يشكروه دارو شي جمعيات كتقول عليه “خادم كبير للمغرب والمغاربة أينما كان ، وفي مختلف مناصب المسؤولية التي تقلدها” كيفاش تخدم بلاد وانت تهرب منها باش تعيش فبلاد كنتي كتمثلها.
غريب هاد لشي وبزاف.
