مصطفى الشاذلي – كود القاهرة ////

تفتح التلفزيون فشامبر فاوطيل فالقاهرة بمصر تعرف كيفاش كتفكر هاد الدولة. كلشي مخططة ليه. شخصيات واحداث رواية “جمهورية كأن” لعلاء الاسواني ولكن ماشي متخيلة بل واقعية. كل شيء في مصر جيد وكثر من جيد. الاستثمار مزيان. شركات كانت مشات فالسابق ورجعات فهاد الوقت٬ كيف نشرت “الاولى” المصرية صباح اليوم الخميس 27 يونيو فاخبارها الاقتصادية باللي شركات المانية قررت العودة للاستثمار بعد ما كانت مشات هادي 6 سنين. بالحساب بغاو يقولو مشاو مع الرئيس الراحل محمد مرسي وجات مع الرئيس عبد الفتاح السيسي.

هنا كلشي فيه وضوح. خدمة الرئيس وتحركات الرئيس و”انجازات الرئيس” وسياسة الرئيس الخارجية. لدرجة ان العافية شعلات هاد الصباح فمنطقة اسمها “العتبة. تم ربط الاتصال بالمراسل الصحافي فبدأ بثه المباشر باللي المطافئ جاو بسرعة ودارو خدمتهم وبقى كيهدر عليهم اكثر من دقيقة. لم يتحدث لا عن وجود ضحايا من عدمه لا عن خسائر مادية لا عن اسباب العافية هادي. كلشي خاصو يقدم باللي الدولة دايرة خدمتها واخا بهاد الطريقة الغريبة.

بعد هاد الاتصال جابو شي فقيه ازهري خدام فالاوقاف والموضوع طبعا الارهاب والفكر الارهابي ومحاربته. اول ما نطق قال “تحية لشهداء الوطن” يقصد رجال الامن والجيش اللي تقتلو فعمليات ارهابية. كولو كيهدر غير على الاخر فكرو متطرف خاطئ والدولة هي اللي عندها فهم صحيح للدين.

باش تكمل جولة فقنوات مصر تلقى اللي كيمشي مع توجهات النظام. كاينين غير قنوات الدول الصديقة: ها السعودية ها الامارات من ابو ظبي حتى لدبي ها ميريكان من الحرة وغيرها ها فرانسا من خلال فرانس 24. القنوات القطرية ما كايناش ما عندهاش حضور. الاخبار غير العربية والحرة وفرانس 24 والرياضة غير قنواتهم ما كايناش فهاد لوطيل اللي جا فالجزيرة فحي الزمالك بمصر قنوات رياضية من غير قنوات مصرية. كلشي محسوب. طبعا ما تحلمش تلقى قنوات تركية اللي قريبة من مصر ولكن فالمقابل كاينين اكثر من 5 قنوات صينية فيها وحدة باللغة الصينية. اردوكان وتميم ما عندهم ما يديرو وما خاصش خطابهم يدوز ففنادق مصر. دول داخلة فخانة العدو. غير متابعة صغيرة لصحافيين فالتلفزيون يبان ليك حجم عداءهم كيف كيشوفو نظام السيسي.

هنا بلا ما نتحدثو علي جرعة الوطنية غادية تجي فمقال اخر. الوطنية المبالغ فيها للي كدوز فقنوات مصرية.

مصر غادية على طريق واحد. طريق راسمو ليهم السيسي.