عفراء علوي محمدي- كود//

رفعات قبل قليل من يومه الخميس، غرفة الجنيات الابتدائية بمحكمة الاستئناف بكازا، جلسة محاكمة الصحافي المعتقل سليمان الريسوني، للاستراحة، حتى تكمل بعد ساعة من دابا، فهذ الجلسة اللي تقدر تستمر لليل.

وماحضرش الريسوني لجلسة محاكمتو اليوم عاوتاني، وهذشي للمرة الرابعة على التوالي، وهكذا الدفاع ديالو دار طلب عارض باش تجيبو المحكمة، وتساءل علاش كتتم محاكمتو غيابيا واخا بدا رغبتو بالحضور، إلا إلى كانت المحكمة خايفة تبان وضعيتو الصحية الحرجة أمام الراي العام بعد ما يجي للمحكمة، خصوصا وانه مضرب عن الطعان ل85 يوم.

ورفضات المحكمة هذ الطلب بعد مداولة قصيرة المدة.

واستنكر المحامي محمد المسعودي، دفاع الريسوني، رفض الطلب، ومنين جاوبو رئيس الجلسة، بوشعيب فريح، بأنه من الأفضل مناقشة الطلبات الأولية باش مايضيعش الوقت، قال المسعودي: “راه هذشي فإطار الطلبات.. هذي محاكمة باطلة حيت المتهم ماحاضرش…”.

وفهذ الجلسة، كشف حسن الطاس، دفاع الريسوني أنه تقدم، من السجن، بشكاية للوكيل العام للملك بالمحكمة بخصوص التحريف اللي طال تصريحاتو، أثناء ايفاد ضابط الشرطة القضائية من أجل ابلاغو بانذار المحكمة للمثول أمام المحكمة.

وحسب الطاس، فعضو آخر من هيئة دفاع الريسوني تخابر معاه، تقدم الريسوني أيضا بطلب للرئيس الأول للمحكمة، باش يخبرو أنه مستعد للمثول أمام الهيئة لمناقشة قضيته وفق المادة 287 من قانون المسطرة الجنائية، ووفق معاهدات حقوق الانسان والدستور المغربي.

وطلب الطاس بأخذ الشكاية بعين الاعتبار، وفتح تحقيق دقيق لوضع النتائج القانونية المترتبة عليه.

واستعرضات هيئة دفاع المتهم مجموعة من الطلبات الأولية، منهم المسعودي اللي قال أن المشتكي بالريسوني، آدم، كان عطى شريحتو وتيليفونو للنيابة العامة، وتكلم على مكالمات ومحادثات بينو وبين الريسوني فيها معطيات كثيرة، “لكن تقرير الخبرة اللي دارتها المصلحة الولائية اكدات انها مافيها والو… واللي شرفو على البحث التمهيدي ماداروش الواجب”، حسب تعبيرو.

وبخصوص واقعة الاغتصاب، قال المسعودي أن آدم فتدوينتو اورد وقائع مغلوطة كثيرة، كتبين أنه ماشي هو مولاها، بخصوص الكوزينة اللي قال ان الريسوني سدها عليها، والكوزينة ماعندهاش حتى الباب، وبخصوص إغلاق باب بيت النعاس عليه من بعد، وهو ماكيتوفرش على فتحة الساروت، “الدار كلها فيها جوج اقفال، ظيال الباب الرئيسي والمرحاض”، وآدم جا لهذيك الدار 2 مرات وتغدا فالصالو اللي مفتوحة عليه الكوزينة، وبالتالي صعيب يدير هذ الخطأ إلى ماكان هو اللي كتب ديك التدوينة”، على حد تعبيرو.

وطالب المسعودي المحكمة بإصدار أمر بمعاينة المنزل، وأخذ شهادات من عند الناس اللي دخلو ليه وعارفين كي داير.

وطلب دفاع الريسوني ببطلان كل إجراءات البحث التمهيدي واستبعادها ورفع حالة اعتقال الريسوني، كيف تقدم بملتمس السراح المؤقت فحق الصحافي المعتقل.

وبحال عادتو، ماجاش آدم لجلسة محاكمتو اليوم، فيحين حضرو دفاعو.

ويتابع الريسوني فحالة اعتقال احتياطي لازيد من سنة بتهمة الاحتجاز وهتك العرض بالعنف فحق الشاب آدم.