كود الداخلة //

عبرت مجموعة من النسوة الجمعويات بجهة الداخلة، عن تذمرهن الشديد من تنظيم سباق “الصحراوية” بجهة الداخلة، وأكدن بأن هذه التظاهرة جابت الذل لهاد الجهة، وبغات تضرب جميع العادات والأعراف المعروفة على ناس المنطقة ف الزيرو، حسب ما عبرو عليه.

هاد الجمعويات بنات الداخلة، فتصريحاتهم لعدد من المنابر المحلية، أكدوا بأن المشرفين على السباق، اعتامدوا على مبدأ الإقصاء الممنهج، وبأن أغلب المشاركات ف التظاهرة اللي تصرفات فيها فلوس صحيحة، جاو من خارج الجهة، فالوقت اللي المرأة المحلية تم إقصائها ولا مكان لها فالتظاهرة.

واستنكرت النساء الجمعويات، المحاباة الكبيرة التي تحظى بها المسؤولة عن السباق من طرف بعض الجهات محليا، ومستغربين كذلك من الأساليب اللي كتعتامد عليهم مولات السباق، وكيفاش كيتفرض على جميع المنتخبين يحضروا ويدعموا السباق بأموال طائلة، واخا كان من التهميش هو نصيبهم فكل تفاصيل و مراحل هاد التظاهرة.

العيالات الجمعويات صرحوا كذلك بأنه سبق ليهم شاركوا ف السنوات الأولى للسباق، ظنا منهم أنه يحمل أبعادا إنسانية وعندو طابع اجتماعي، ولكن من بعد مابانت ليهم النوايا الحقيقية للمنظمين و للتظاهرة ككل، ولاو كيطالبوا بتوقيف هاد العبث اللي مامعروفاش أهدافو أصلا، و اللي كيضرب ف عادات وتقاليد ناس المنطقة وخلات الجميع يتفرج ويضحك فيهم.