كود بركان //

الحسين عموتة خرج من التيران فرحان بالربح على الجزائر والتأهل إلى نهائيات كأس إفريقيا للمحليين 2020.

وقال عموتة انه كان كبتوقع ماتش صعيب لأن مستوى المنتخبين متقارب، وان الجزائر عندها لاعبين مهاريين، مضيفا أن المنتخب المحلي اضغط من البداية لأنه ابحث عن الهدف الأول وحقق المراد ديالو في توقيت مناسب، لأن اللعابة كانوا حاضرين من الناحية الذهنية والتكتيكية وحتا الفنية.

عموتة أكد بلي الماتش سهال على المنتخب المحلي بعد تسجيل ثلاثة لزيرو ف الشوط الاول، واضاف “كنا عارفين بلي منتخب الجزائر غابجي باش يدير شي حاجة، وكنا ضاربين الحساب لهاد الشي، كنا متخوفين من مفاجاة وجزئيات، لي يمكن تبعثر أوراقنا، ولكن الحمد الله نجحنا باش نخلقوا الفرق بتسجيل الهدف الأول في الوقت المناسب، هو لي حررنا سهل علينا الماتش، وزدنا الهدف الثاني، لي عطانا الاطمئنان”.

عموتة شكر سطاف ديالو كامل لعابة وطاقم طبي وتقني وإداري وحتا المسؤولين الجامعيين على رأسهم فوزي لقجع، رئيس الجامعة لي گال بخصوصه إنه كان أكبر مدعم ومساند للمنتخب المحلي.

وأكد عموتة في الندوة الصحافية بلي الهدف ديالو ما شي التأهل للشأن والدفاع عن اللقب، بقدر ما هدفه الأساسي هو يكون لعابة للمنتخب الأول، وكيتمنى يحقق هاد المبتغى.

وگال “هدفي كيف ما سبق لي گلت ف أول ندوة صحافية هو الاستمرارية وضمان تمثيلية لاعبي البطولة ف المنتخب الأول وغادي نشتغل على هاد شي”.