عفراء علوي محمدي- كود//

400 فنانة وفنان مغربي عبرو على الإدانة ديالهم لهذ الملاحقات القضائية اللي كاينة فحق الصحافيين والنشطاء، من خلال توقيع بيان ضد قمع حريتهم فالتعبير والتشهير بهم واعتقالهم بهذ الطريقة.

الفنانين قالو، فبيانهم اللي طلعات عليه “كود”، أن “النشطاء والصحافة المستقلة يتعرضون للهجوم والاعتداءات التعسفية في الفضاءات العمومية، باتهامات غير ثابتة”، وعلنو على التضامن ديالهم معاهم، على اعتبار أنهم “اليوم يهاجمون الصحافة، وغدا سيهاجموننا واحدا واحدا، لنحضر أنفسنا وننظم صفوفنا”، كيف قالو.

وقالو الفنانين أنه كاينين مجموعة من القضايا اللي تشدو فيها صحافيين بنفس الطريقة باش تشد عمر الراضي، اللي تابعوه بمجموعة من التهم، أبرزها الاعتداء الجنسي والتجسس والعمالة الخارجية ضد المغرب، واللي قالو انه تعرض ل”التخرش والتشهير من طرف البوليس، غير حيت دار تحقيق فالسياسات الاقتصادية”.

من جهة أخرى، البيان انتقد حتى “إعلام التشهير” كيف سماه، وقال أنه “امتداد مباشر للتأطير البوليسي والقمعي للمغاربة” حيت “يتم تصوير المناضلين رغما عنهم وتضرب نزاهتهم عرض الحائط”.

ووقعو البيان مجموعة من الفنانين الكبار، امثال الفنانة أوم، والمسرحي ادريس كسيكس، والمخرج فوزي بتسعيدي، والمؤلف عبد اللطيف اللعبي.

وكان سبق ل100 صحافي وقعو بيان مشابه كيطالبو فيه السلطات باش توقف هذ المتابعات ضد الأصوات المعارضة، وكينددو بصحافة التشهير، بينما مجموعة من الجمعيات خرجات فبيانات كتطالب بإطلاق سراحو.

وجلسة التحقيق التفصيلي مع عمر الراضي غادي تبدا ف22 شتنبر.