كود اسماء غربي ///

واش ماشي وقت اقالة وزير الصحة الجديد لتدبيرو لهاد القطاع فهاد الفترة ديال “كورونا فيروس”. فين احزاب المعارضة المراقبة لعمل الحكومة. علاش ما كتهدرش. دابا هاد الوزير ما كيكلفش راسو حتى يجي يدير ندوة صحافية. كل نهار مع الستة العشية كيضحكو على لمغاربة. كيجي شي منطيحي من هاد الوزارة كيقرا حوايج كاع لمغاربة عارفينها من خلال الموقع اللي دار.

كيهين لمغاربة حقاش كل نهار جايب لينا واحد او وحدة. في حين كاع دول العالم كيكون اما مدير الصحة العمومية فوزارة الصحة او مدير مديرية الاوبئة. صحاب الاختصاص. ثانيا كيهين لمغاربة باش يقرا عليهم اللي رسلو الوزير وكيمشي. في حين ان كل الدول اللي كتحتارم المواطنين ديالها فهاد الفترة الخايبة بزاف٬ كيديرو ندوة صحافية. اييه ندوة صحافية بحال اللي كيوقع فاسبانيا اللي قتل فيها البارح الفيروس اكثر من 700 اسباني. كل صحافي كيرسل بالواتساب سؤالو لمدير التواصل وكيقراه على المسؤول وزير او مدير مديرية الاوبئة وكيجاوب عليهم مباشرة. هادي ساهلة بزاف. علاش ما دارتهاش الوزارة.

كل نهار كتكون ندوة صحافية كيحضر ليها لاگوارديا سيفيل والجيش والبوليس ومدير الصحة. كلشي يهدر كلشي كيجاوب على الاسئلة. بعد ساعة كيجي وزير الصحة وحتى هو كيدير ديكلاراسيون وكيجاوب على الاسئلة.

علاش فالمغرب ما يجيش الجيش والجدرامية ووزارة الداخلية ومدير الاوبئة كل نهار. هاد الشي كيريد الثقة فالبلاد. هادو يجاوبو على الاسئلة

الوزارة بدات مزيان وشدنا بهاد الشي باش كان اليوبي مدير الاوبئة كيهدر. من بعد كاينة صراعات خلاتو اللاور وما بقاوش حاملينو. واش هادا وقت الصراعات.

الوزير خاصو يطيروه على فضيحة اخرى هو كيفاش اطباء فالقطاع العام والخاص عوض ما يحميو لمغاربة تصابو بالفيروس. اطباء كيقولو دابا كاين 11 حالة. فهاد الحالات ما تصابوش فالصبيطار او لكلينيك اللا بحال طبيبة الحي المحمدي فكازا اللي عطات دارها بجيرانها كانت عندهم گنازة وتعادات وهي اللي جابت العدوى للصبيطار. باش تعرفو كيفاش عقلية الاطباء عندنا. فزمن كورونا فيروس باركين كينصحو فيها وهما اصلا ما داروش الاحتياطات. كاين تسجيل صوتي كتقول فيه هاد الشي.

ثم كاين اطباء كانو برا بحال ديال مصحة تطوان وجاب الفيروس للكلينيك.

خاصو يطير من بلاصتو على الاحتجاجات اللي دارت فطنجة وفمراكش وفمدن اخرى من ناس الصحة ما عندهمش باش يحميو ريوسهم وكاين اللي ما كيعرفش حتى يستعمل هاد الشي.

خاص الوزير يستاقل او يطيروه فتدبيرو لقضية مصحة تطوان. اكتفى باش طير المدير الاقليمي لوزارة الصحة. تدبير كارثي واتهامات خطيرة من الوزارة لطبيب تبين من خلال وثائق نشرها انو متخصص ماشي طب عام. فين هاد الوزارة وكيفاش فهاد الوقت تخرج اتهامات بلا ما تتحقق مركزيا.

دابا كيفاش المغرب يالله عندنا 358 حالة وعندنا 23 حالة وفاة ويالله تشفاو 11 حالة. المانيا فيها الاف وماتو ناس قلال. اش كيعني هاد شي؟ ان هادوك الاسرة اللي مجهزة بالات التنفس وكتعوض التنفس ما خدماتش او كاين خلل كبير فالصبيطارات. هادي مسؤوليتو. هو رافض يجاوب على تساؤلات لمغاربة وراجع للاور.

لحد الان سياستو فشلات فكلشي وتفرش. مسؤولو هاد الوزارة كذبو على لمغاربة فاول بداية الفيروس. غير على هادي خاصو يطير. كيفاش هادا كان كيسير مستشفى جامعي. تدبيرو للملف كارثي. قاليك حكومة كفاءات. دابا نادمين على ايام الحسين الوردي.

دابا هو الوحيد اللي مقودها على صورة المغرب. امنيا الامور مزيانة واجتماعيا تخادت قرارات مزيانة صحيا ما كايناش الثقة فهاد السيد.